李辰安 - 北上消费 分薄香港生意？ ｜辰来之笔

有人话，搞死香港经济，最好北上消费，我听到之后，马上约齐几位好朋友，黄昏到小酒馆一聚。

每到假日，香港人都北上消费。

周末及周日，不少香港人都赶着过关北上。

深圳兴建了不少大型商场。

不少年轻人都爱北上玩乐。

周末及周日，不少香港人都赶着过关北上。

假日北上 周围都系香港人

中环近日热闹中带一点忧郁，睇见银行伟慢慢行过嚟之步行姿态，就系一图胜千文，你见就知近日投资界有几颓。「辰哥，走紧下坡呀，行到索晒气。」我吓到唔知点讲。「乜走下坡，你咪行紧斜路上嚟。」之不过，佢真系头耷耷，好似望住个地下行咁，但好嘢在佢能够平衡得到。大师兄细细声同我讲︰「呢次个市好似几反常，不过，又系意料之内，情理之中。」咁难明，不如入去饮杯先，张翁已经同靓仔侍应碧咸仔讲波经，猛咁讲，来来去去都系讲美斯宝刀未老。

「我同你讲，美斯现在去踢美国波，对手唔系欧洲班豪门，所以佢咪可以好轻松踢足球罗。」系噃，佢行下行下都可以控制全场，唔讲唔觉，美斯已经进化到踢佛系足球。「即系少林足球，笑住嚟踢。」我想更正，星爷踢波好严肃，边有笑笑口呢。

大家四个人又坐埋一枱，我马上报告，都系唔好下个月一齐坐和谐号上广州。「唉，第一个理由，周末、周日成半个香港都北上，四面八方都系人，所以不如谂下去第二度；再讲，大家都应该有班人留港消费，你睇现在酒楼食肆，好似分薄咗好多。」张翁叹一声︰「唉，总之一言难尽，我都唔知点讲，特区领导人成日带团游大湾区，社会贤达又话大家系大湾区人，咁，即系点？」

香港消费单一 搭高铁北上多玩意

今日天气好咗少少，可能入秋，感觉系几爽。「安仔，你几时决定广州四日三夜游？试下五星级酒店下午茶，最好望住个广州塔，一边食葡挞一边饮咖啡。」大师兄，唔系一定有葡挞，你不如去澳门啦。「大家都知，经过三年疫情，所有人都好挂住按摩、食火锅之生活，香港系好，但消费几单一化，搭高铁就会海阔天空，上完广州，下次去潮州汕头，哗，谂下都开心。」

我此刻无搭嘴，陷入了沉思，想到好多好多嘢。我有个朋友个细佬，原来已经一半住深圳一半住香港，「佢搭火车往返，两边都有生意。开头唔多惯，依家准备睇下有无笋盘，实行北上置业。」大师兄话︰「我个世侄女好打得，帮间公司打拚，一个礼拜都要返上深圳、东莞两至三次，佢话，点解唔谂下去中山买楼，因为中深通道好快通车，住中山个零钟头返到上环，总之就要北上啦，因为香港成千万元一层楼，打工无可能。」

张翁一听见大师兄讲中港房地产话题，马上又闸住︰「讲呢啲，香港楼都有平价，住远啲有得倾，例如住天水围。」我心谂，对面就系福田，如果我后生，我会过去睇下啱唔啱住。不过，都系换个话题。我问香港有无计搞旺个夜市。「辰哥，你想特区变山东烧烤城？好似有少少九唔搭八。」我都费事驳你，饮杯啤酒消消热气。

「香港以前有个大笪地，不过系半个世纪之前，现在可以搞乜？」银行伟睇个市几淡，睇香港更加淡，唔知佢点解，算把啦，如果有乜睇唔开，又或者唔开心，真系返上去住啦，你搵埋咁多，都唔使做啦，周五落嚟同大家饮杯，周三中环饮茶，几写意。

「唉，内地楼市都几麻烦，如果要买楼都系睇定啲先，辰哥，不如又谂下去泰国，四日三夜都OK，嗰边都有楼盘参观，讲唔定都啱我有朝一日退休之选。」好，饮杯先再谂。

 

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ