李辰安 - 哀怨的大鱼｜辰来之笔

鲸鱼葬大海 香港安居难？

香港海域近年都有鲸鱼出没。

西贡早前有鲸鱼葬身大海。

有市民租船观看鲸鱼。

鲸鱼浮尸海上。

西贡早前有鲸鱼葬身大海，被发现后捞上船上。

我同大家讲咗，呢个月都唔想食鱼，你明就明，唔明就去问黎明。唉，唔食鱼，可以食虾或者龙虾，一样得！

大师兄讲：「安仔，你真系九唔搭八，黎明边有你咁得闲，你唔食鱼，无问题，反正日本刺身现在都唔系太受欢迎。」今日约埋茶楼老板，五个人打夏日边炉，张翁话，唔食鱼就食牛肉，一于潮汕口味，之不过，可以加几碟带子、生蚝，有无问题？茶楼老板介绍大家食象拔蚌，我就无乜太大兴趣，因为要点日本青芥辣，入口已经好似去咗玩奖门人游戏，流晒眼泪，真系食唔出象拔蚌系乜嘢味。

银行伟一个唔该，叫咗两打冰冻啤酒，「辰哥，食芥辣要用啤酒中和一下，至唔怕辣。」大家话题讲起周深名作《大鱼》，我问大家听过未，歌词好有意思又应景，「海浪无声将夜幕深深淹没，漫过天空尽头的角落，大鱼在梦境的缝隙里游过，凝望你沉睡的轮廓。」大家话呢首歌好好听，周深歌功一流，不过，大家问我，点首《大鱼》畀边个听？唉，你哋用心欣赏以下一段︰「看你飞远去，看你离我而去，原来你生来就属于天际，每一滴泪水，都向你流淌去，倒流回最初的相遇。」

茶楼老板就有慧根，佢话我系唔系凭歌寄意，哀叹西贡海中那一条不该来而来之「大鱼」，我没有做回应，大家明就明啦。「其实香港唔系一个宜居城市，咪话鱼啦，人都住到呼吸唔到新鲜空气，好多后生仔屈身于一个无窗嘅劏房，你话点算好。」茶楼老板话，佢有位堂叔，上世纪60年代游水过嚟香港，前后三次先至成功，其中有一次是三个高中同学，一男一女是小情人，那知游到未够一半就天气转坏，于是乎几经辛苦游返转头，但系两个同学从此再无消息，相信已经去咗陪伴大鱼。

人生兜兜转转 世事难料

「看海天一色，听风起雨落，执子手吹散苍茫茫烟波，大鱼的翅膀已经太辽阔，我松开时间的绳索。」老板话呢一段就好有电影感，当年阿叔系用绳绑住两个波波游嚟香港。「转眼间就几十年，现在阿叔喺广州买楼，又返上去住，你话人生系咪兜兜转转？不过，如果阿叔无得嚟香港，又无之后嘅故事。」佢阿叔走去做厂，因为可以在厂留宿，捱咗几年升为师傅，又做过厂长，都算几好呀。

「大家讲啲轻松话题，有无买六合彩？」张翁，你都真系为转话题而转话题，六合彩呢家嘢，在座无乜人有兴趣？「讲时讲，十几二十年前，我个个礼拜都有买一张或两张电脑飞，不求横财三千万，但求发个好梦，但系随年纪增长，我都再无通过马会做慈善啦。」

潮汕牛肉以生切鲜牛最为滋味，我就话和牛更加好味。「李生，九龙城火锅名店几年前自由行高峰期，好多内地同胞就唔会点乜嘢生切牛，千五蚊一碟和牛先系首选。」原本街坊打边炉，成枱人一晚最多食一千银，但系呢班内地客，三、四个都可以食成五、六千蚊埋单。

「佢哋唔系一片咁渌下渌下，而系一二三成碟倒落去，真系眼都唔眨。不过，现在和牛打边炉已经平民化，唔会千几两千蚊一碟，所以大家有口福。」和牛雪花肉质系好神奇，入口又爽脆。「大家唔使怕，和牛有优质蛋白质，如果你唔怕肥，食多几片仲可以保养皮肤。」咁，张翁要食多啲，你咁贪靓又唔认老，食和牛，掂呀！当然，我系无讲出口，大块大块和牛趁热食，好啦，休息下先。

 

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ