李辰安 - 年年二十五岁咩！｜辰来之笔

无限活力 值得学习
 

「年年二十五岁」谭咏麟，好值得香港人学习。

七十岁踢波好闲事。

谭咏麟开几场大型演唱会，又飞来飞去，同班后生仔踢波。

日日运动三十至四十分钟，老人家最适合。

日日运动三十至四十分钟，老人家最适合。

今日饮茶，见到张翁瘦咗好多，有乜问题？唔通又学人唔认老，唱歌加踢波，搞到几日跌十几磅。

银行伟话：「安仔，张翁有能力有魄力，玩下玩下，天气又热，咪当减肥。」茶楼人客疏落，可能落雨又闷热，不如坐办公室休息。「世侄，我边有去踢波，你估我系年年二十五岁咩，人哋本事，我最多都系游水晒太阳。」系噃，张翁后生打英式榄球，佢家学校系传统英式学府，踢波好似唔多晓。

银行伟自言最叻打羽毛球，一身轻盈又有弹力，造型潇洒，踢波，唔好玩啦，佢见过朗拿度踢世界杯，已经放弃少林足球之梦想。「我就话踢波好嘞，一对白饭鱼走天涯，当年大头仔都系好似我细个咁，踢硬地足球，之不过，我要去乡下读书，所以放弃足球生涯。」我一边食烧卖，一边听大师兄吹水，想当年，佢踢波都系论论尽尽，乜鬼嘢足球生涯吖，执波都嫌你唔够醒，之不过，我无讲出口，只系搭句口︰「烧卖好烫口，大师兄小心，唔好挂住讲。」

张翁话，同佢差不多年纪之「年年二十五岁」谭咏麟，好值得香港人学习。「人生七十开几场大型演唱会，又飞来飞去，同班后生仔踢波，可能有人网上留言话佢大肚腩，于是乎，马上减十零磅畀大家见识下。」

 

心境年轻 量力而为
 

我好似听讲「年年二十五岁」并无咁夸张，依家已经回复正常。「七十岁踢波好闲事，我见到湾仔有个街坊，八十岁嗰头，都满场飞。」其实只要大家心境年年二十五岁，人生再无年龄阻隔，如果可以，爬喜马拉雅山都可以。「就听你讲，搞一场珠穆朗玛峰演唱会，网上开Live，全球见证，有无得谂？」我就话，张翁你肯赞助一定无问题，你咁有兴致，使钱无问题啦。「世侄，你去珠峰开演唱会我就会赞助。」你唔好大我，等我返屋企考虑下先。

食完烧卖，忽然见到鱼王行过，佢话不如拣只西澳龙虾二斤重，起肉炒球，好清新噃。「鱼王，你真系好介绍，下次嚟食晚饭先啦，今日不如灼斤海虾啦。」张翁话食海虾有蛋白质，可以防止肌肉流失。「近日减磅，可能系天气问题，又可能身体新陈代谢有问题，所以我都唔食粥粉面饭啦，食多啲蛋白质。」无问题，我话人生七十，点都要小心饮食，得闲多啲运动。「不过，千祈唔好太过剧烈，超人话斋，量力而为呀。」

超人叫后生买楼量力而为，好似无叫人家运动量力而为，之不过，都系有道理，有医生教落，日日运动三十至四十分钟，老人家最适合。「不过，我见到史泰龙伯伯，同埋阿诺舒华辛力加公公，七老八十都日日举铁，成百斤咁举，点计数？」张翁话，举重运动都好重要，配合跑步、游水之带氧运动，咁就Very Good啦。

银行伟话，人到五十就要养生，最紧要唔好有咁多压力畀自己︰「嗱，打一个唔系太啱听之比喻，当你可以参加中年选拔赛之时，仲未有能力买楼，咁你就唔好再咁博，一日做足十个钟都无希望啦，不如放松一下，Hea做，唔好急，再唔系就转工，有时做保安都有益又健康，好似我楼下嗰位阿伯，面色红润，见到人都笑，你估佢咩料？系英国大学生，退休搵份轻松嘅工。」伟哥住半山豪宅，嗰头嘅保安管理人员英文了得，一早就知道卧虎藏龙，大学生有乜问题，内地大学毕业生好多要抢住做外卖车手。

「好啦，食嘢食嘢，饮啖茶，养下生。」系，大家轻松。
 

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ