李辰安 - 宝岛大狂欢｜辰来之笔
2023-07-03 00:00 
台湾巨星涉不雅行为
上网睇八卦新闻，宝岛近日好似俄罗斯咁乱，好多知名巨星涉不雅及不法行为，我一声长叹……
是日好心情，事关工作做妥，无后顾之忧，系时候谂下放大假去旅行。行到入去中环小酒馆，原来已经人齐，仲开始摆开个龙门阵，好，快啲行埋去，听下讲乜先。「世侄，你想唔想知马骝闯入民居大闹两粒钟时，最后由专业人士用香蕉请佢入笼，先至平息事件。」咦，张翁乜你唔系胸怀千万里咩，讲股讲汇讲国际时事系你擅长，你唔系讲中美关系，普京个厨师因何出位出事，点知转头讲民生趣怪事，确系心事细如丝罗。
「安仔，唔好九唔搭八，民生无小事，更何况走只马骝入屋村，可大可少，既涉环境生态，又反映人类同情心，呢啲新闻应该关注。」我望下银行伟，佢无表情，只系展示出一副好假之笑容，我一时之间亦搵唔到嘢同大家讲。「不如我请大家饮杯冰冻啤酒，贺下只马骝无事，大步槛过。」我其实想讲，今时今日无人关心世界大事，原因好简单，因为缺乏娱乐性，任何大事都系意料中事，边够只马骝入屋咁引人入胜，仲有，大家有无发觉坊间最Hit新闻系搵三几十年前明星名人做比较，乜乜胀爆到唔认得，某某六十岁好似十六岁，当然，少不免又攞上世纪八十年代之男女拍拖绯闻讲。唉，唔通连德高望重嘅张翁都有兴趣？
大师兄细细声讲︰「你估张翁系超人？人点会唔八卦，何况佢老人家咁活泼，又跟得上潮流，好似边个边个个女结婚，新郎型过外父，呢单嘢畀佢讲足半个钟头。」张翁同其他酒友打完招呼行紧过嚟，我同大师兄即时转换话题。
成箩黑历史 问你点算好？
「讲开又讲，宝岛演艺界好似爆咗个核弹咁，你噏得出嘅明星，原来都有成箩黑历史，问你点算好？」有乜点算好，最好请教张翁。「世侄，你哋都系细啦，男女相亲自由民主为原则，有乜系黑历史？除非涉非法不良嗜好，咁就另计。」
话说，香港有位粤剧界前辈，几十年前上电台畅谈圈中绯闻，佢就话︰「好似我哋喺粤剧团出身，后生细仔学做戏，跟剧团穿州过省，日日好似露营咁，旅途寂寞，但隔篱就系异性团友，咁你话点呢？其实大家思想好开通，你明啦！」张翁话，你以为台湾系一个一尘不染之小确幸文青之地？大家都系饮食男女，之不过，爆出嚟，变咗八卦新闻，咁好多旁观者就会指指点点起哄。
好嘞，话咁快饮完一Round啤酒，不如换个话题啦。「我都好想去宝岛行下，好耐冇去，你知道嗰度有好多嘢食。」讲开台湾美食，我细细个同屋企人过去四日三夜游，一日三餐几乎都喺街边食，有推车仔和大排档等等，印象中系好好味，不过当时系暑假，无冷气都几辛苦，上一次想过去搵返儿时记忆，点知已经无街边美食，好在台湾小店小厨都好有水准，所以十分满意。
「台湾好热，边有人7月、8月过去，又热又成日打风，最好系11月中出发。」张翁提议不如去顺德啦，酒楼老板上次去完返来，畀咗个地址佢，可随时去叹美食，系陈村菜正宗。银行伟就反建议︰「搭高铁去潮州汕头，仲多好嘢食。」讲老实，天热又打风，今个月都系一动不如一静，去本地主题公园嘅靓酒店Yeah下稳阵。「安仔，你想探米奇、米妮？咁得意。」无乜问题，其实我想同巴斯光年影相，大家几时一齐去吖。
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应