李辰安 - 悲过韩剧｜辰来之笔
2023-05-23 00:00 
韩星是后生仔最羡慕的一群，不过，近日爆出韩星背后的辛酸史，明星公司拖粮烂尾，好惨啊！
韩国娱乐演艺 赢过香港同日本
网上传来内地经济不景消息，两成后生仔打工无着落，有得开车做外卖已经算好，睇完心都噏。「安仔，内地大学生多，千几万人毕业涌出嚟，喺大疫过后日子，试问仲有乜笋工可搵！」我同大师兄毕业之时，亦都好烦恼，因为前景唔明朗，我哋一班同学仔打信求职，个个都超过百封，不过，几乎无回音，有位理科同学过咗暑假都无着落，为咗唔想家人担心，一于努力搵工。「系呀，我都记得佢，去咗沙田某商场做保安，做咗大半年，先至去私校教书，讲下讲下，几个十年，当年大家都好焦虑。」
张翁刚到，先来一杯威士忌加冰，大家要醒醒神，唔好挂住想当年。「经济年年都有好有唔好，俄罗斯有压力，不过，原来经济反而有增长，美国同欧洲就唔多好，所以老人家话斋，好唔好睇得咁好，淡唔好睇得咁淡，平常心，呢个世界又点会无挑战。」银行伟加多句︰「金融大鳄传来大吉利是消息，但系已经辟谣，佢仲好精神。」
好啦，大家饮杯先，当系贺下大鳄身体健康，长命百岁。「香港似乎畀佢老人家炒起，搞到人心惶惶，毕业搵工好头痕。」大师兄，亚洲金融风暴嗰阵，搵唔到工都唔算凄凉，韩国金融崩溃，全国上下要捐出金器救国。「辰哥，韩国几乎破产，好彩有世界银行等机构肯借钱，助佢哋渡过难关，唔系就真系唔得掂。」
之不过，韩国自此之后，举国奋发图强，后来又有高科技成就，手机卖到世界第一。「仲有，自此之后，韩国娱乐演艺都有好大进步，今时今日已经赢过香港同日本，系亚洲Number One。」究竟韩国有乜秘诀可以如此华丽转身？「世侄，韩国人好勤力，考试压力劲过香港好多，所以人家成功有原因。」
大明星被拖粮 辛苦钱不知去向
话虽如此，最近有消息指韩国大明星被公司拖粮，成几百万港纸，反映韩国风光背后有隐忧，事关韩国女子组合嗰位Lisa姐，都曾经被经理人食夹棍，辛苦钱不知去向。「系罗，韩国演艺界好大压力，你睇Lisa同佢几姊妹好似成日都笑口常开，但系有侧面消息报道，佢哋生活全无私隐，日日都要笑面迎人，好辛苦。」真系无阴公，牺牲咁大，仲要畀公司食埋人工，变成白做，点算好？春青有限，阿姐变阿姨容乜易，到时转行？
「最感人系韩国大明星被拖粮话生活无影响，仲要主动向有需要人士施以援手，帮无粮出嘅同事睇医生。」唉，唔通呢啲就系韩国版之「人人为我，我为人人」，几时拍套赚人热泪之韩剧？「我就话，韩国唔方便拍或者唔想拍，可以搵晶哥谂谂，整套合拍剧，应该有噱头。」大家又举杯劝饮，做人最紧要开心。
「安仔，你都九唔搭八，人哋咁惨，你就当噱头，真系凉薄。」大师兄，人间悲剧向来系电影好题材，华南影帝电影系列，乜你无欣赏过咩？「好啦，今日不如到此为止，讲啲开心话题。」大家讲炒股同炒楼，呢排都好似几好景……
「几时去首尔旅行？听讲嗰度有好多打卡点。」我就好想去首尔食炸鸡加啤酒。「辰哥，野蛮女友条桥都成十年咁耐，你有无Update一下啲韩流娱乐？」我又点会有你咁In，我都费事同你讲，饮完酒，不如去食韩国烧烤，你点睇？
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应