李辰安 - 好彩无出境｜辰来之笔

中国放五一黄金周大假，可以连破好多个世界纪录，令人叹为观止，一切终于回复正常，四名酒友又再聚。
 

五一黄周时，南京中山陵游客众多。

假期完结，旅客挤满高铁站。

旅客在火车站候车室排队。

香港也到处人群。

澳门观光点满是游客。

内地游客去黄山观光，天黑要入厕所过夜。

大漠游客忙于接载游客观光。

大漠也设有红绿灯。

游客争相玩激流。

西安景区到处是人潮。

黄山观光 天黑入厕所过夜
 

大师兄话：「安仔，你又话去澳门，有无行手信街？」好在我改变主意，去咗西贡睇下撞唔撞到发哥，先至偷得浮生半日闲，享受清福。张翁皱一下眉头︰「你当发哥系香港野生保护动物，得闲就去西贡野生捕猎？」发哥喺黄金周去咗铜锣湾，咁啱畀游客遇到，成功合照摆上网，变成当日十大新闻。「好多人赞香港明星接地气，反而内地二三綫小明星不知几巴闭，成队人护驾。」银行伟话内地明星保安呢行养活唔少人，呢一个唔系接地气问题，而系经济分配之关键，系星都请十几二十人开路，全国有成千上万小明星，乘一乘，呢个创造岗位之乘数效应有几大。

「系啦，今年有一千二百万大学生毕业，就业都几困难，后生仔集体去庙宇求签，真系人浮于事。」大师兄有感而发，我就帮佢斟满杯啤酒，顺下条气先，呢个世界，好唔好睇得咁好，坏唔好睇得咁坏，我哋人多好办事，无问题。

「所以话，香港班明星就做坏规矩，你睇『校长』成日返内地，几个人坐街边叹美食，半个助手都唔见，其实应该请一百个人帮手开路，呢啲唔系要威，而系促进内地消费。」

唔好讲呢啲，原本买船飞去澳门，点知爆棚，有人话搭巴士啦，我就去西贡行山，返到屋企见到澳门手信街人多到你唔信，有网民呻笨，佢话逼咗入去都搵唔到食，打卡店排「蛇饼人龙」，于是返出去是但搵家茶餐厅医肚，行程完全不似预期，行到想喊咁滞。

「不过，澳门都算好，内地朋友去黄山观光，乜都无，天黑要入去厕所过夜。」银行伟话，北京、广州大塞车，于是乎，放假惨过返工。「我去西贡就几悠闲，行完山，唔想食海鲜，不如搭的士去将军澳啦，嗰度有好多商场，千祈唔好落尖沙嘴，太多人啦。」张翁话，中环都算正常，铜锣湾就人山人海，除咗有发哥，更加有当红年轻超级巨星出没，非常热闹。
 

广州出名塞车 要注意交通
 

我问大师兄有无去深水埗觅食？「你都九唔搭八，无啦啦做乜去深水埗，我要饮奶茶咖啡，食肠仔煎蛋公仔面，楼下都有十几家畀你拣。」无嘢，深水埗有好多打卡店，乜你无上网睇过KOL介绍咩。讲时讲，旺角都有好多美食，读书时代帮衬过唔少锯扒名店，不过，依家都好似花果飘零，无乜几家健在。

张翁话，旺角牛扒有特色，尤其是铁板牛扒，呢一味可算香港美食文化遗产，不过，旺角牛扒有好浓之黑椒汁味，但唔知点解，食落就无牛肉味，不过，胜在食得有气氛，吱吱声捧上嚟，出晒烟，斋讲都觉得春青返嚟。

今日酒馆人气唔算鼎盛，唔知系咪大假放完之后，大家要休息下。「安仔，几时去广州玩，好多香港明星都去广州打卡。」系噃，搵日去广州饮早茶都好，听讲当地名店，有过百款粤式点心，唔系香港咁简单，食来食去都嗰十几款。
去广州迟啲可以港车北上，唔知大家有无准备，驱车上广州，唔塞车都应该几好玩，更加可以沿途游乐，去完中山上佛山。「世侄，广州出名塞车，平时都寸步难行，又无停车位，茶楼老板去完广州，叫大家要注意当地交通。」咁就去顺德食私房菜，一于咁话，大家再约。

 

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ