李辰安 - 杀你一半订金｜辰来之笔
2023-04-11 00:00 
有两位老人家的爱情生活受到国际关注，作为小市民觉得，呢啲先至系世界新闻，成日都讲俄乌战事、美国加息……
侵侵桃花运强 后果严重
近日天气转为阴阴湿湿，行路都要打醒十二分精神，一下踩错脚就好大件事。「安仔，你讲梅铎呢位传媒大亨呀？」咦，大师兄一早坐喺吧枱前，精神爽利，唔通你行紧桃花运？「乜嘢桃花运啫，你识唔识㗎，桃花多半带劫，有桃花运，你就真系行路都要分外小心。」
「两位世侄，乜咁好兴致讲中国文化？玄学呢家嘢好多人以为迷信，其实系国学的一支，大家都听过台湾国学大师曾仕强讲《易经》道理，你两个真有文化。」前辈，好在有手机帮忙，我一秒之内搵到呢位国学大师之个人资料，已经过世了，不过令人留下深刻印象系30年前预言日本无运行，美国亦都就嚟行完尾运，21世纪中叶就系中国Number One时代。
「我都有留意曾大师，大家上网可寻，不过，讲起桃花运，大家都知道桃花运好强之美国前总统，依家因为前度女朋友爆料，搞到好大镬。」银行伟人未到，声先到︰「嗰位系香港人通常名之为女优，唔系乜嘢女朋友。」
其实我好憎呢种事事求学术定义，唔识从人情世故去谂嘢之人，其实做另类片种艺术工作，乜唔可以同好似侵侵咁有型又有才华之有钱人谈情说爱？婚外情系另一个问题，总之，你一开口就以职业作为怀疑对方之依据，我好唔同意。不过，我亦无谓出声，费事教精你。「伟哥，伟哥，饮杯鸡尾酒先，你好似系拜登支持者！」
传媒大亨再婚叫停 收回礼金？
讲呢啲，不如讲下几时返大湾区，成日有内地经纪致电介绍中山楼盘，我都想去睇下。「安仔，呢排少咗好多呢类电话，我个中山表弟话，好多人返嚟睇楼，做到唔得切，所以无人得闲Call你。」张翁话︰「阿爷都开始逐步放水，想推起个楼市咁话，香港人返大湾区置业，系时候啦，你哋都要认真考虑。」
系啦，依家人生漫长，分分钟过百岁都可以环游世界，当你70岁退休，还有几十年你享受人生，内地有层楼，可以继续风花雪月。「讲开又讲，九十几岁嘅传媒大亨，原本计画结第五次婚，不过有消息传出呢位多情男士要叫停。」大家估下，唔通出现三角恋爱？抑或老人家身体有问题？「如果我系大亨个仔就会好高兴，因为最怕第二时爆出争产官司时，又多一个对手。」
张翁话︰「人家自有百年后安排，唔会咁易打官司。」大家建议不如开支威士忌，加冰畅饮可以驱走湿气。「富豪最豪之消费就系玩结婚同离婚游戏，大亨第二任老婆系记者，共处三十几年， 离婚分到约17亿美金身家，呢个系二十几年前之事，当年系天文数字。」
明白，不过，钱唔可以带走，谈谈情、结结婚都系分身家，好似美国前总统咁，路边野花乱咁采，听讲最高可能被判百几年监禁。
「喂，你不如浸佢猪笼啦，行桃花运要坐百几年，乜嘢法律？」银行伟解释呢单官司唔系锄佢风流咁简单，而系牵涉一连串商业欺诈、内幕文易行为，大家唔系法律界人士，最好都系当睇新闻，听故仔就算，讲咁多都无谓，不如饮杯先啦。
传媒大亨唔知之前有无订咗酒席？「安仔，你都九唔搭八，不如你问大亨过咗大礼，畀咗礼金未？」我谂礼金可以收返一半，香港买楼规矩嘛！
《星岛申诉王》于3月1日隆重登场，节目为民请命抱不平、追踪城中热话，亦会搜罗温情小故事。你申诉，我跟进，搵91999933，《星岛申诉王》随时候命！
立即报料：https://bit.ly/3IMunqd
你的独家报料一旦被采用及报导，将获得乙份奖品。
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应