李辰安 - 百岁人生时代｜辰来之笔
2023-03-28 00:00 
传媒大亨迎来第五次婚姻
听讲传媒大亨梅铎92岁迎来第五次婚姻，大家在中环酒馆为他举杯庆祝，呢位寿星公新郎哥，掂呀！
大师兄好冷静，大家放低酒杯之后，佢赠大家一句︰「如果呢位老人家系楼下三叔公，攞老人金同综援过活，大家有无咁喜气洋洋。」其实，我真系唔想窒佢，你铺话法，有呢单街坊新闻，你唔使忧香港各大媒体唔会报忧，就系大台都会望完看完，又再睇真啲，92岁阿公又又又再结婚，肯定热搜新闻Number One啦。不过，我当然唔会窒人窒到出口，话晒都系师兄，你话系敬老又好，和谐也好，难得大家把酒言欢！
张翁好似好兴奋，佢饮完一大杯啤酒，再来一杯，仲要同大家讲故事︰「我乡下有位亲戚好身壮力健，九十几岁再娶老婆，双方年龄差成四分三个世纪，咁都未系传奇，一百岁时幸得一名女儿，全村开心到不得了。」原来老尚风流是寿徵，老人家有福气，亦代表家族有福气，所以大排筵席，隔篱村都过嚟贺一贺。
呢位寿星公个女亦好争气，长大成人留学美国，依家在彼邦定居，张翁同佢系亲戚，去美国都有搵佢饮茶。「一百岁都添丁，咁即系人生开始，如果识唱歌都可以参加老年好声音噃。」大师兄又搵我嚟闹︰「安仔，你都九唔搭八，你去搞个老年好声音比赛呀？」我心谂，我有财有势又有号召力，就不如搞个老年好结婚啦。
银行伟好有兴致，原来日本时兴60岁过外老男人搵50岁的异性谈恋爱，得闲相亲，有缘就步入教堂，呢一个风气催生了一条银发族之产业链，阿公阿婆都要珍惜青春，你话有几多生意可做？「婚姻介绍所就好生意，美容健身亦会多咗好多不是年轻人的顾客。」系啦，你睇龙哥几红粉绯绯，仲有四哥、修哥耐不耐都有绯闻，老人家唔系孤独一个人坐公园数落叶，可以扮靓仔同好朋友拍拖。
日本老龄化 80岁服务员好平常
讲开传媒大亨，佢有咁多身家，结多几次婚，容乜易分晒？「世侄，佢系世界级富豪，自然有好多合约安排同保障，就当佢大方同有缘人分身家又如何？钱又带唔走，最紧要开心。」不过，日本系老龄化社会，男女以「人生百岁」为生活目标，你估60岁退休之后，系咪仲要做到90岁先至搞得掂，事关唔系人人都系传媒大亨。
「辰哥，你有留意新闻都知日本好多服务业人手短缺，80岁服务员好平常，90岁喺汉堡包店炒散都有。」讲时讲，医学昌明大家又识得调理身体，平时注重健康，80岁返工都OK啦，修哥90岁都开演唱会，真系好青春。
「世侄，我有个世伯过百岁啦，新年同我哋打麻将，仲约定出年早啲嚟，食几件年糕，饮杯普洱茶先，开心到成个细路仔咁。」我想起，原来人生可能未行到一半，因为呢一个系一百岁年代，但系，你有压力我有压力，如果60岁退休，未来成半个世纪咁长，边度搵钱养活？如果65岁先至结婚，或者再再次结婚，呢头家点顶？我系传媒大亨就无问题，学似修哥识唱识跳咁就更好，不过，要我90岁返工，放工又要顾住拍拖，你估有无咁好精力？
「安仔，谂咁多，开支威士忌补身，血气运行，包你精神。」张翁话︰「不如今晚去饮炖汤，男人要补下至得。」都有道理，学似龙哥话，最紧要生活协调，呢句系金石良言，唔好忽略呀。
《星岛申诉王》于3月1日隆重登场，节目为民请命抱不平、追踪城中热话，亦会搜罗温情小故事。你申诉，我跟进，搵91999933，《星岛申诉王》随时候命！
立即报料：https://bit.ly/3IMunqd
你的独家报料一旦被采用及报导，将获得乙份奖品。
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应