李辰安 - 笑到腰痛，哈哈哈｜辰来之笔

打爆个流浪气球啫，几乎震散个股市，好担心强积金投资又有损失，所以好急搵银行伟请教。

呢个世界原本好好，又话世界和平，大家和和气气，殊不知，搞啲咁嘅嘢，世界两大强国反面咁滞，依家人心虚弱，唔好玩啦。行入去中环小酒馆，银行伟仲未到，但见张翁同大师兄已经坐低吹紧水。「哗，你乡下依家好唔掂，劝你有钱都唔好返『乡下』住。」我好镇定咁Order一杯威士忌，定定神先，系嘞，唔该加冰。「安仔，有几声咳，就唔唔好饮冻嘢啦。」

 

日本爆出核突事件

 

我乡下有几唔掂，唔通春节过后，开始又有病毒作怪？都好难怪，十几亿人挤公交、挤高铁，好难避免人传人。「你讲乜呀，安仔，真系九唔搭八。」大师兄你咪闹我先啦，我真系想复活节前返去大湾区考察置业事宜，如果依家周围爆疫，我都系唔好去住啦。

银行伟此时刚到，佢话全世界都奇怪中国疫情忽然终结，叫我唔好乱噏。「伟哥，系张翁话我乡下好唔搞，你不如问下佢点解。」大家酒过三巡，讲清讲楚，先至明白大家原来系一场误会，即系咁︰一、张翁话佢个乡下，唔系我乡下；二、中国疫情高峰已过，证明大疫不过三年呢个民间智慧神奇准确；最后，两地通关畅顺，系就大家约埋一齐下个月去大湾区行下。

「三年无返过内地，好似真系有啲乡愁感觉，唔知珠海、中山沿途之美食店复常未呢？」原来张翁口中之乡下系香港人的「乡下」，即系日本，呢个国家好弊，爆出几单民间异常核突事件之后，好多香港人依家开始唔认系佢乡下，好似公司个烈女OL陈小姐，好嬲咁喺茶水间话︰「我无呢啲咁嘅乡下。」唉，日本已经穷咗三、四十年，以前乜嘢美好时光已经系回忆，既然系回忆就好好珍惜，好好收藏，好好保护，以后唔好返咁多乡下，或者根本再唔返乡下，咁咪人生多美好，做乜系都要去日本同啲香港人自己逼自己，逼餐死咁呢？

 

法国巴黎乱局又起

 

「好似我年轻后生时，当年的知性女生，莫不以巴黎为梦想之乡，当时佢哋唔会话去巴黎当返乡下，因为机票几贵下，三几年去一次，次次忽发春情话要『死在巴黎』，听落好浪漫，今日再讲就笑到腰痛。」张翁，不如饮杯威士忌，可以镇痛噃。

巴黎，近日立立乱，因为福利讲唔掂数，我谂今日你去到巴黎只会重温噩梦。「安仔，乜嘢噩梦呀？」你都九唔搭八，「返乡下啦你！」大师兄，返边度乡下先，日本呀？不如悭去昂平360好过。

话时话，中国有个民间气球失控飞咗过去美利坚，搞到出动隐形战机，又射导弹，搞到个股市嗰心离一离，我想问下银行伟有乜睇法？「元宵佳节放天灯系中国民间习俗，不过，美国文化同我哋唔同，你都要顾下人家感受。」都无话射导弹咁大件事！「辰哥，无事啦，中国疫情神奇终止，全世界睇好中国经济复常，你话一两个气球又点会阻住个地球转。」

张翁话，不如去隔篱打边炉，听讲象拔蚌有优惠价，五百蚊够四个人食，另外可以搵九龙城生切牛肉打底，包大家满意。

好啦，一于打边炉，不过，我想问，几时真系成班人去大湾区玩几日？「一定要，预埋上广州，然后搭高铁返香港，好唔好？」大家临去打边炉之前，饮多杯威士忌，醒呀！

当年的知性女生，莫不以巴黎为梦想之乡。

法国人不满现状，当地经常有示威游行。

日本有寿司店因恶作剧影响生意，有网民见义勇为，自发光顾。

不少香港人爱到日本旅行。

香港复常后，港人纷纷出外旅游。