营地重开｜严选四大最佳观星营地 两大热门精选 预约营地即日开始

继早前政府宣布烧烤场重开之后，下一轮就是营地，由下周起（11月17日）渔护署辖下郊野公园的 41 个露营地点终于再次跟大家见面了，感觉简直系「恍如隔世」，这两年大家的日子是怎样过呢？哦，其实都系一样啫，只系部分人转投私人营地，不过政府营地开返，最开心当然系不需分文租场，就可以再次享用设施。

营地重开，快啲Plan下去边度玩先。

收拾好行装就准备出发。

西贡嘅海滩一向都系热门观星好去处。

呢排要添置返啲露营用品啦。

贝澳营地下星期开始都接受预约。

几年前HotCha都去过贝澳营地相聚。

西湾营地风景优美，有港版马尔代夫之称。

四大观星营地一览︰

东平洲营地

的确，在没有光污染嘅地方，观星系特别靓，远到好似东平洲咁就真系相当唔错，平日冇船入去（包船除外），只有假日进出，如果玩得终极一点就可以周日入去住足五晚，但系要预咗冇人岛冇物资补给，所以唔建议新手咁玩。正常玩法可以周六坐船入去玩两日一夜，营地只能容纳十二个帐幕左右，设施方面有烧烤炉、台櫈、污水穴、晾衫架与凉亭，一个旱厕，水源属于季节性水源，只有溪涧，所以最好带定几公升水。由码头行去营地大约十五分钟。

西湾营地

经常听人讲桥咀岛（没有官方营地）系港版马尔代夫，其实小编就觉得西贡四湾（西湾、咸田湾、大湾、东湾）先至系，而且西湾仲要系相对较容易去，景致又优美，难怪响露营界别嚟讲系四湾之首，而且呢度先至系政府法定嘅露营地点，有好多配套设施，包括可容纳五十个营的空间，而且呢度有标准厕所、烧烤炉，搭小巴去到西湾亭落车后行四十五分钟就到，小编见到唔少人直头可以拉住手推车入去，要带用品嘅话极之方便。而相对没有冇光害的沙滩，绝对系观星热点。唯一要注意嘅系潮汐涨退，有机会影响到沙滩水位嘅。

昂平营地

呢度讲紧嘅昂平系马鞍山，不过老实讲大屿山嘅昂坪营地一样系观星好去处，前者就容易去兼且有个大草地，无论系望落山定望上天都冇得输，后者就比较宁静，仲要有标准厕所、台櫈、煮食炉位、露营平台等呢啲星级嘢，相对好适合新手。不过营地面积属于小型，马鞍山昂平就大好多，如果嫌草坪位置睇星唔够靓，仲可以夜行上大金钟的山顶。

马鞍山昂平只有冇旱厕及季节性水源，比较适宜有少许露营经验嘅人士。

浪茄湾营地

都系西贡，但过咗东霸再入少许嘅浪茄湾营地，实在可以称得上世外桃园，不过真系要千山万水、长途拔涉行入去，小编多年前嘅印象就系：哗！香港啲水竟然靓到见底？由山顶未落到浪茄湾一刻已经有惊艳之感，但听讲近年多咗好多游艇会周末泊到浪茄去，姑勿论系点，营地就开返啦，都系得好少营位，设有烧烤炉及台櫈等，没有士多补给，要带定所有物资行入去，三小时左右啫，咁辛苦你都去，见到漫天繁星嗰刻就值回票价。

 

两大热门营地一览︰

扶轮公园营地

最热门嘅营地都非佢莫属，点解呢？有巴士地丫嘛，睇下官方介绍：「营地位于大帽山郊野公园扶轮公园烧烤区内，邻近荃锦公路，交通便捷。每个营位均由散发芳香的植物围绕，如米仔兰、桂花、含笑等。营地旁的烧烤场地方广阔，适合大型团体活动。附近的扶轮公园设有观景台，可以在此饱览荃湾及青衣一带景色。」讲到咁靓同咁Easy，当然系最受欢迎。设施方面有厕所、有水喉，真系星级，好适合一家大细。

湾仔营地

另一个非常之受欢迎嘅营地，当然就系近住海下湾嘅湾仔营地，湾仔营地分南、西两个，提供大量空间（草地）予大家尽快去使用，最重要系交通唔算太复杂，坐小巴入海下之后行四十五分钟就直达，另一办法系入黄石码头转街渡，连行路都唔驶。呢两个营地最精彩系有厕所之馀仲有沐浴设施，呢个本身已经系超星级，夜晚可以观星，日间可以玩水，唔怪得之周末可以有咁多人......奉劝大家最好选择平日去。

可预约营地：

如果好惊同人争，又唔想话去到要等人哋走，仲有一个办法就去预约啦，以下呢两个营地都开放俾人家预约，包括：

荃锦营地：（已开始预约）https://www.camping.gov.hk/tc/index.php

贝澳营地：（下周四开始预约）https://www.lcsd.gov.hk/tc/camp/campsites/p_ng_po.html

 

 

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ