李辰安 - 深圳河变泰晤士河｜辰来之笔

我都话未嚟得切买花生，呢场「英超」赛事已经吹鸡完场，话咁快又换个第二场，世界之事真系好奇妙。

大家又在中环黄昏作无所事事之酒聚，听我讲「英超」，靓仔侍应碧咸仔行埋嚟问︰「李生，你讲边场赛事，我好似无留意噃。」大师兄独自一人饮啤酒，有无搞错，天气都转凉，仲饮啤酒，还加把口同碧咸仔讲︰「佢周时九唔搭八，听佢发噏风，系浪费青春。」

张翁话︰「又唔好咁讲，世侄梗系讲嘢有骨，你估真系睇英超咩。」银行伟今次好醒︰「辰哥唔通想讲英国首相之争？」醒即系醒，好多人唔识避忌最新一轮英相更替，唔系大选，因为无选举，好似今届香港特区行政长官一样，系众望所归，唔使咁多投票手续，你话英国无问题，香港亦都系无问题，千祈唔好话英国首相无代表性，又无民意基础，更加唔系夹硬嚟。

「安仔，唔好再讲啦，维园都无档摆，你悭番啖气讲古好过，系嘞，最近有无写小说？」讲呢啲，我想讲「英超」赛事正就系唐宁街十号之争，估你唔到系我想睇铁娘子翻版卓慧思几时翻艇，殊不知，花生都未嚟得切买，就换咗画，依家坐低要睇系辛伟诚（见图）担纲演出，正所谓如果你咁啱行出去便利店买花生，返来已经踢第二场。

「你点睇呢位印度裔英国首相？」恕我直言，用一个不太适合，但又几抵死之比喻形容，就好似特区忽然由乔宝宝出任行政首长咁样。「安仔，你真系九唔搭八，真系唔知你想表达乜嘢？」我心谂，你都话维园论坛收咗档啦，大家吹水，当然天马行空，我一定唔会讲出声，大家酒聚系成个礼拜最开心时间，大家唔好拗，拗嚟做乜啫，人哋够话搵刘天王做特首啦，今次如果我话奖门人都有意角逐下届首长，又得唔得？

「大家不如开支法国红酒啦，秋凉好合时令。」其实，政治就系一台戏，大家当睇Show，如果讲到青筋暴现，又何必呢？「不如大家估下辛伟诚可以做几耐啦。」嗱，唔系我讲，银行伟发谬论咋。「伟哥，你想买边个系下个庄？肥波唔会咁快翻兜？」

呢支法国红酒都算系浪得虚名，酒身薄弱，好似差啲噃，唉，算啦，两百蚊，你想点？早知要葡萄牙气酒好过，不过，好似唔啱张翁心水，因为太甜，你知啦，老人家最怕糖，身体紧要，饮到一百几岁就最好。

讲起肥波，有人话佢似梁醒波，正宗喜剧之王，大家点睇？「肥波前首相唔通佢似李奇呀，你比喻九唔搭八。」大师兄，咁都畀你闹，你近排炒燶股票咩，咁躁底。系噃，都似啦，深秋天时都猛咁饮冰冻啤酒，我都谅解你嘅处境，如果你真系有玩股票，好似我咁，无炒股，躺着都中枪，因为强积金已经唔见咗好多钱，一讲把几火，早知唔饮呢支淡淡地之法国红酒，我不如都学你饮冰冻啤酒。

梁醒波演喜剧，最叻系诈儍扮懵，成个人游魂咁，忽然无厘头，然后噏三噏四，带人游花园。「世侄，你嘅比喻又几精警，肥波就系一个喜剧首相，没有之一，你估佢今天留力唔跑，让位予辛伟诚，是否有后着？」我就唔评论啦，费事有人话我喺不适合场地讲唔适合之话题，我都系讲生活话题。

「系啦，香港会加电费，吓到我个心离一离，以为俄罗斯断油影响埋我哋。」听讲英国人要去埃及度假避冬，因为留在英国，要畀好贵电费同天然气费用。「不过，你做超级市场就无得咁潇洒，除非你可以遥距工作，又或者系老板啦，仲要系大老板嗰只至得。」听讲好多留英香港学生都会返来，我其实提议，不如英国大学来港办学好过啦。「世侄，边有咁多地畀你开学校，香港租贵吖嘛。」

无问题，可以去大湾区，开多几家英国学校都唔怕无生意，英国老师可以在大湾区享受暖气，又有温泉、高尔夫球场，有得谂。

「系噃，世侄，大家去英国读书都系买佢品牌，但唔一定飞去原产地读书，好似德国名牌车、美国电动车都系中国生产，大家悭啲，一家便宜几家着，好提议。」大师兄嘴藐藐咁话︰「去微缩景区办英国学校啦，有条山寨泰晤士河咪几好。」

我都费事睬佢，一于转饮啤酒，醒下先。