李辰安 - 岁月流声｜辰来之笔

我是电视机前时代的人，最近睇到大台之历史档案节目，所有回忆返晒嚟，今日天王逐个捉，令我有如坐上了穿梭机。

秋天终于来了，我说秋天的感觉回来了，早排热到透不到气，成日话有超级台风接近，结果带来低气压，香港变成热港、闷港。「安仔，唔好呻咁多，今日大家畅饮法国红酒，慢慢享受人生。」又嚟到中环小酒馆，讲开陪伴大家五十几年之大台，重睇过往经典节目回顾，先知道某年某月某天王巨星，原来系某个节目做人肉布景板，又得知天王、天后细细个样乜咁鬼薯，真系恍如隔世。

我好多年前捧过活地亚伦场，睇佢嗰部大作《岁月流声》（见图），英文系《Radio Days》，大家有印象无？「世侄，我系电台时代长大，你就系电视台一代，差咗一个世代。」虽然如此，我当时睇到活地阿伦之叙事能力，简直佩服到五体投地，无綫电改变阿伦之童年，唔知张翁又如何？

「当年听歌最紧要，尤其是欧西流行歌曲，黄昏五点左右有个节目，是我全日精神食粮，至于空中广播剧都系好吸引，食完饭夜晚黑就有好多精采选择，不同台有不同王牌，不过，内容就无乜记忆。」我系捞电视汁长大的，睇大台之档案节目，原来当年系好有竞争气氛，跑得出之演艺名人都唔系少嘢。「好似星爷，我系佢儿童节目之铁粉，当时我都系大学生啦，其实好有冲动上去佢节目，可以近距离用块纸板同在场小朋友互动。」

一讲电视台，大家都不愁无话题，但我深深品尝这杯红酒之后，忽然有一啲神伤之感，此情何来？「大师兄同我当年喺宿舍，同一班师兄弟都系拥发达台，唔多Like大台，因为睇发达台自觉好前衞，唔似班女生咁，挂着睇华仔扮督察。」大师兄都仲记得，当年有位高级督察暂时停职过嚟大学读书，佢话点解有真嘅督察无人识欣赏？

「佢真系风趣，督察同华仔比，我唔知讲乜好。」大家饮呢支法国红酒，性价比一流，如果煲剧更加一流，可以饮足成支，然后天光前瞓觉。讲开发达台，当年有位徐大侠系我哋偶像，因为佢好似仲型过华仔，与此同时，发达台之武侠剧集部部经典，如果今晚要煲剧，我必选徐大侠之代表作。

岁月如歌，唱唱下又几十年了，今时今日有种电视剧种叫国剧，我好少欣赏，唔知点解，我感觉与自己格格不入，反而之前台湾剧集，我比较有喜欢之作，可能年纪问题，睇台剧时，人比较后生，今时今日好多事物对我而言，唔系咁有新鲜感同好奇。

当日睇「F屎」，心里有团火，见到杉菜有微妙的触动，依家见到「神仙姐姐」之国剧演出，我可以讲句︰「哗，睇你面部表情就够啦，来来去去三、四个表情，之不过，佢后边班演员个个好专业，演技无可挑剔，但我唔系好惯呢种女一表现，不过，人靓就唔需要讲道理。」

「世侄，你话退休返大湾区住，依家最好习惯一下内地娱乐，神仙姐姐你都喺度指指点点，说三道四，以后你返大湾区睇书啦，好唔好。」其实我无捞电视汁好耐，以前都有铺瘾去录影心仪剧集，搞到成屋都系录影带，不过有咗互联网之后，我反而睇经典影视之短视频，原来咁样睇又有不同欣赏角度，好多著名场面变成我不断翻睇之娱乐。

银行伟依家睇Netflix，所以大家无乜交流，佢话︰「细个睇电视，最锺意系睇大力水手。」有无睇叮当、Q太郎，仲有小生？「安仔你最锺意系睇大力水手，因为有个大力水手女朋友好似你嗰个校花咁样。」大师兄，你唔好屈我，嗰个校花系你「飞佛」，成日去图书馆想撞人，你估我唔知，不过，你又唔系布鲁图，人家点会睇得你上眼？于是嗰个校花畀一个好Man之男生追到手，你去图书馆凭吊啦。

大家开开心心又饮到差唔多，最后讲到佳丽选举，之前好着重一人一票，其实用民意选靓女好似离开正题，不过，当时香港气氛如是，亦唔怪得电视台，其实如果要追潮流，我觉得可以取消泳衣秀，改为穿中国民族服装，中国有五十几个民族，各有特色，一来唔怕畀人批评，二则唔怕冻病参赛者，大家谂谂，我哋一行四人食晚饭啦。