港式Seacation｜The Mira一站式玩法 游船河玩水住酒店人均$950起

在过去两年的抗疫，让香港本地游有新玩法，先系流行咗一个叫「Staycation」嘅词汇，简单嚟讲就系留在香港享受酒店的假期，重拾在外国旅游时住酒店吃喝玩乐的感觉，继而仲有「Flycation」及「Seacation」，都系一啲机构例如航空公司或者邮轮公司，想带俾大家旅行感觉而创做出嚟嘅旅程，离唔开香港海域或者香港嘅天空，但一样要有旅行感。

借用「Seacation」呢个字眼来宣传嘅就系香港其中一间型格设计酒店The Mira Hong Kong，点解一间本地酒店会同海洋住宿有关？睇清啲其实佢哋系玩紧一站式游船河连住宿，今次呢个2日1夜住宿套票系包括咗一日豪华宽敞的法国双体帆船型格出游，呢款船可以提供不论系二人嘅浪漫、八人嘅家庭同乐聚会定系多至二十人嘅美食派对都招待到，豪华游艇上提供充气滑水道、充气浮垫、香蕉船及滑水等刺激嘅水上活动，另备冷气供应、开放式厨房、豪华沙龙及船头日光浴区等。至于航行路线就可按个人喜好去选择，包括香港海上秘景，又或者浅水湾、清水湾、南湾、南丫岛等。

玩完水就返酒店hea，入住酒店套房连早餐、仲可以享受Vibes仲夏主题嘅鸡尾酒及顶级香槟。想玩尽啲，仲可以额外升级去享受MiraSpa水疗，或者体验Mira Wanderland，尽情玩模拟赛车或者密室逃脱等。

唔讲唔知原来出海套票都可以有咁多嘢玩，价钱嚟讲当然就唔系sell平，二人派对入住尊贵白金庭园套房或极致奢华庭园套房，优惠价就由$18,800起，相对地八人家庭聚会就平少少，包两间套房系$16,800起，最划算当然系二十人的派对，共八间城景客房，优惠价系$19,000起，即人均低至$950，如果有成班朋友同你去癫，真系可以考虑下㗎。

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ