生活小帮手｜实用App帮手搵厕所行山定位 发求救讯号

正所谓「人有三急」，好需要搵个厕所嘅时候就会突然脑残唔知点算，原来今时今日有好多工具App设计咗出嚟，帮到好大嘅忙，例如以下几个App就够晒实用，一App旁手随时救一命。

「Toilet Rush冲厕」︰搵厕所App帮你定位，会话你知附近最近嘅公厕位置，而且会显示系男厕定女厕，有冇残厕，有冇厕纸提供，有冇淋浴设备及婴儿设备，系咪公共洗手间等等。虽然有朋友话，如今去搵公厕倒不如冲入商场更加快，不过好多旧区唔系话咁多商场，又或者某啲商场好似迷宫一样好难搵厕所，所以有App点都帮到下。

「MyMapHK」︰最劲嘅位系由地政署去研发，方便快捷地查阅由地政总署测绘处提供的数码地图。当中有六大选项，包括咗香港街道图，细致又精准，连门牌号码都有，选择交通状况亦会立即知道有冇塞车等，而想量度两地点之间的距离亦可立即拉綫搵到。另一实用的选项就系「远足」，内置咗香港各大主要的行山路綫，资讯详尽，又有图片又有scale，仲有埋标高柱资料，一定唔怕迷路。另外仲有一项叫「Emergency」就好劲，点击即帮你传送出SOS Message，包括用SMS/Whatsapp等方式，内有你目前的GPS资料，万无一失。

「eSeaGo」就系海事处海道测量部，所提供嘅海图资讯，最劲嘅地方系可以响离线模式之下使用，配合返你移动设备的定位功能，协助响香港水域内行驶。所以好多船家都有呢个App，至于我哋一般市民用得最多就系潜水员，如果出海玩就可以大约知道下潜位置，大概有几多米水深。另外，eSeaGo使用者仲可以设定自定图层、航线点及兴趣点，如果经常出海到附近海域玩，就有备用数据，分享俾朋友或自用都唔错㗎。

立即下载 |全新《星岛头条》APP