辰来之笔｜打边炉真幸福

终于到了2021年最后一个月份，你问我有乜愿望，最想大家整整齐齐来一次朋友欢聚打边炉，点解呢？

大家有所不知，南非出了一种新的变异病毒，好似话劲过之前嗰只几百倍，好难预期未来会否成为第五波大流行，所以食得好食，有边炉打就好打，一旦实施严格限聚令，大家可能就要天隔一方，到时真系打鬼打马咯。

「世侄，你做乜讲埋啲咁嘅嘢？你唔见o依家个市旺过旧年好多，我细细声话你知，我要碌人情卡先至打尖攞到呢张枱，你咪以为我六时恭候，你就六点半入席喎！」你知啦，我唔知要食高级名牌火锅店反而要排队，平时食开嗰家平价街坊任食火锅就唔使等，首先谢过张翁。

银行伟用佢职业视野同大家补一课内地打边炉行情，真系唔该晒。「火锅行业原来几好做，嗱，上世纪八十年代有饮食界朋友Sell我合资在旺角开一家三层楼高之粤式火锅店，当时我好想落搭。」张翁就充当香港倒后镜，抢咗银行伟个话题，先来一个香港火锅发展简史之介绍。

原来佢后生之时，粤式打边炉系大排档生意，好少人会开个似样之大店经营。「世侄，当年只有北方涮羊肉先至会店面经营，全部都系走高级路线，所谓粤式打边炉系大家坐喺街边烚下烚下，通常你用大中小之大杂烩形式上枱，即系有鱼片、牛肉、肉丸、鸡件、水鱿、虾、蟹、一兜生菜，加几只鸡蛋咁。「系啦，我细个跟屋企人去庙街食唔少，仲有喺上环大笪地，九龙城就有好出名之炭炉潮州沙嗲牛肉火锅。」张翁话︰「一般而言，因为要踎响街边用个背脊挡着寒风烚下烚下先至有风味，所以大热天时就无人打边炉。」后来饮食界人士去过泰国，见到当地系热带地区，竟然时兴四季都照打边炉，就恍然大悟，如果开大个冷气在室内打边炉，有乜问题，于是取经过来，上世纪七十、八十年代大力宣传四季火锅呢个Concept。

好啦，大家唔好讲咁多，先来一轮大啤酒，跟着先尝一下靓靓大生蚝，跟住会上今日主角菜式象拔蚌。大师兄话︰「我有位亲戚系做火锅店部长，佢话四季打边炉个商业模式好Work，因为唔使厨房工序，最多系要切肉同分菜式，减省好多工夫，所以火锅店老板都几好赚，后来全港都跟风，你开我又开，以致竞争好大，如是者，粤式四季火锅店就无咁好赚，加上行内水准参差，唉，过多一阵，就变成火锅店泡沫，只有少数可以生存。」

银行伟问大家锺唔锺意食和牛，叫碟大家共享。「喂，你望下个价钱先，我见过名牌火锅店，要三千蚊一碟。」张翁建设都系食新鲜切牛啦，和牛好食，但性价比唔啱数。「伟仔，早几年自由行高峰期，内地同胞对三千蚊一碟和牛最捧场，我同行内人士相熟，佢话内地豪客通常Order三几碟，然后一二三，一齐放入个锅，正所谓一镬熟，眼都唔眨一下。」系罗，唔似我哋本地人烚下烚下，其实食象拔蚌都好豪啦，一于听前辈之温馨提示。

讲开又讲，内地原本火锅成行成市，先有超高服务水准之乜乜捞连锁品牌店，广受大城市中产后生仔女欢迎，不过，听银行伟讲，近年因为扩张过快，加上管理及各方影响之下，Business Model开始有问题，所以会执几百家以收缩战线。

大师兄话︰「原因系大城市高级打工仔消费力不似从前，好似早几年大行其道之潮州牛肉火锅都不再流行，原本是风行全国，o依家变咗零丁落索。」几年前我都去过深圳食潮州牛肉火锅，不过确系几贵，一个人二百几蚊人仔，食过两三次我都无再返转头。讲时讲，内地消费者能力减退了吗？伟哥，你点睇？

好啦，食牛肉先啦，好新鲜又腍，但腍中又几爽口，性价比一流。跟住落嚟上鲍鱼仔，哗，今餐好满足，o依家食多几箸菜同冬瓜，回一回气先。

二十年前，内地全国兴起四川麻辣火锅，当时我后生又有胃口，所以变咗四川火锅迷，仲要食到面红红为止，讲起都几得人惊，o依家唔会咁搏命啦，食下海鲜火锅，清清哋咪几好。「大师兄，几时可以通关，过返以前内地饮食之休闲生活？」大家都好似无嘢讲，系啦，唔好谂咁多，仲有嚿鲍鱼，唔该，留返畀我呀！