唔通皇室有冤情？——辰来之笔(李辰安)

（作者李辰安，从事创作二十年，开拓城市感觉派文风，与读者一起怀旧，穿越香港时空找寻生活新旨情。）

一向觉得好有亲切感，如同一家人之英国皇室传出突发新闻，二王子哈里忽然劈炮唔捞，退出皇室成员身分，追求独立自主生活。

本来想好咗内容，同大家讲下平行宇宙呢个题材，点知中间爆出呢单料，想讲番两句感受，然后先至入正题，好唔好？「辰哥，英国咁远，关大家乜事？」香港好多人当英女皇系一家人，知无？好多人亦好似我咁，睇住戴妃嫁入豪门，亦睇住哈里仔长大，对英国皇室好有感情。银行伟依然咬住唔放，佢问︰「唔通你想讲下当日戴妃巴黎车祸之事？」无此打算，之不过我忽然联想起，白金汉宫似爱伦坡笔下《厄舍府的倒塌》多啲，皇室家族经过几百年发展，应该收藏了不少奇情怪事啫。例如有巴黎人话戴妃其实未死，当日从隧道失事汽车被救出的不是真人，仲有人话见过佢在巴黎出现。

好嘞，讲下讲下就返到我上次所讲之剧情发展，过往，大家只系识得讲冤魂不散，依家可以归纳为平行宇宙。「安仔，我睇穿你拢嘢啦，你想话戴妃去咗隔篱个宇宙，即系一个不同维度的世界之上，哈里仔感觉到母亲仍在，又或者曾经去过这一个平行时空，同戴妃倾过偈，知道当日巴黎车祸另有内情。」对，大师兄你真系一点就明，故事就系一如你想像，不过，唔该交番个场畀我，你再讲落去，咁我咪变咗听众罗。

新春佳节在即，不如开支香槟醒醒佢。「你咁高兴，系咪以后搭车可以用两蚊？」张翁，我代你庆祝可以享受更多福利至啱啦，开香槟系敬你，我做后辈又点敢叨光呢！当然，话唔定特首唔使好耐再派福利，到时人人有分。「真系大吉利是，安仔，过年就唔好咁百厌，讲番啲正能量好噃。」喝罢成口泡之香槟，不如讲番故仔。嗱，大师兄刚才老作之哈里仔见番戴妃，系属于韩剧路数，不过胜在简单直接煽情。你知哈里仔一向火爆，从另一个宇宙得知皇室秘闻就顶唔住颈，马上宣布脱离皇室。「吓，有乜内情搞到要割席呀？」银行伟，你明知故问，其实，阿哥威廉佢都有去到另一个宇宙，母子三人讲过之后，大家同意返到去就要当乜事都无发生过，唔好泄漏呢个秘密出嚟，殊不知，哈里仔衰冲动，劈炮唔捞震动全世界，威廉王子好嬲个细佬唔听话，大家嘈交，于是畀皇宫狗仔队收到风，即时传出兄弟不和之消息，仲有人猜测哈里仔系唔妥佢大佬，所以要离开皇室。

「你知啦，啲乜周刊系创作中心，知少少扮代表，当大家以为两兄弟不和，引起皇室决裂之时，一个天大的秘密就隐藏在大家耳目之外。」各位，他朝一日，哈里仔唔知去咗边，大家千祈要从正面去谂，哈里仔唔会有事，佢都系挂住妈妈，选择去第二个宇宙，追求更加独立自由之生活。

张翁顶我唔顺，再次温馨提示要大吉利是，佢话再讲落去，他朝有日英国宣布再次给予香港人英国居留权，大家唔好开心住，英国原来系开放戴妃嗰个宇宙畀你居留咋，咁就真系大吉利是过利是。「各位，平行宇宙有一半机会存在，呢个理论被发现咗成百年，以人类科学之进步，好大机会已经揭开真相，但系好似发现外星人一样，被列为绝密，所以大家知啲唔知啲。」

英国科学全世界最叻，统治物理界几百年之大师牛顿就系英国人，佢奠立了经典物理世界，教大家相信宇宙恪守万物可确定之原则，点知有个德国科学家普朗克好搞鬼，从实验室中得出一个惊人发现，原子内部结构其实唔系好稳定，呢个宇宙唔系你所讲咁确定性。英国人当然比谁都关注这个关乎宇宙假设之大学问，或者以英国人「阴湿」成性，知都唔会话畀你知之作风使然，英国人好早从宇宙可确定理论，找出一个不确定之新领域，有理由相信英国人已经有办法处理平行宇宙的方法。

「辰仔，你都讲得几似层层，旧年香港有好多单新闻，就系出现平行宇宙之报道，最叻系英国大台，佢哋出条片、出批相都同我哋个宇宙现实不尽相同，但又明明系好似呢件事。」伟哥，我唔知你讲乜，我讲紧物理学，你唔好走入你个平行宇宙，然后返出嚟乱噏。好啦，畀你窒住我条气，唞唞，饮番杯再继续。