孖菊梓乔夹定口供否认不和 吴若希：坐佢侧边做乜都衰

菊梓乔（Hana）、吴若希（Jinny）、周柏豪等为公司拍贺岁节目，Hana同Jinny齐齐现身，为被指争奖不和一事解画。二人事前已夹好口供有备而来，对《劲歌金曲颁奖典礼》当晚宣布Hana夺「最受欢迎女歌星」一刻，Jinny劲开心拍手表情被指浮跨，Jinny说：「非常精彩，佢（Hana）上去攞奖前，我哋嘅话题就系，死啦，我坐佢侧边，做乜都衰，笑又衰、唔笑又衰，最惨佢系冇反应。」Hana急澄清，自言当时太大反应太激动，反问Jinny：「你见唔到我震晒？我喊呀，我唔系冷静，系过度兴奋激动！」
Jinny续解释当晚大笑原因，说：「笑成咁，我唔系笑紧任何人，系笑紧我自己，『嚟啦，我又坐喺你隔离啦，又有嘢畀人影、畀人写』，个心系咁谂。」她说希望跟公司申请以后尽量不跟Hana坐在一起，「因为好大镬，好辛苦呀，坐埋一齐就话不和，要同老板反映下，早知我唔去颁奖礼啦！」
至于Jinny于社交平台上载众歌手合照，偏偏就没有坐隔离的Hana，被网民问「是否专登唔影一姐？」她说当时Hana不在位，然后入戏说：「张相唔系想表达我不满菊梓乔，其实好认真嘅，我系想表达我不满周柏豪，真嘅，我同周柏豪其实好不和」，然后说当时专登没影坐右手边的柏豪。跟住到柏豪加入这不和二人组变三人组，Jinny再说跟柏豪不和原因，「就系我妒忌，憎晒所有靓仔过我老公嘅人。」（摄影：邓国良）