打不死的小强 杨秀惠望学习艾妞坚强面对挑战

无綫剧集《大帅哥》晚上将播出大结局，在剧中饰演「大帅哥」张卫健二姨太的杨秀惠，凭著「艾妞」一角获赞演技成熟，备演活了该角。杨秀惠亦在大结局这日子，于社交平台以近千字文感谢观众支持「艾妞」。
杨秀惠称：「人人都想自己出身高贵，唔使睇人面色做人，唔使哀求人，唔使时刻担心会流离失所，可以永远过住丰衣足食嘅生活啊。可惜，生活系现实嘅，为咗适应环境同生存落去，佢需要带住虚伪嘅面具，对住人笑，只想赚多啲钱令自己有安全感，因为呢个世界冇人会保护佢为佢著想。」更指出该角色是社会的写照，实在有血有泪。
秀惠在文末更感触说：「今次，我尽了百分之二百的努力去饰演『艾妞』，因为演员永远都系度等个机会，等一个唔知几时先会嚟到嘅机会，等待一个被接纳、被认同嘅机会，等一个下次唔知会否再出现的机会。」最后她更谓：「一切如过眼云烟，喺曲终人散之后一切将恢复平静，学习『艾妞』继续微笑住坚强地迎接人生嘅挑战 #艾妞是打不死的小强」。

杨秀惠全文：
听（今）晚「#大帅哥 」就大结局了。
好多谢大家对大帅哥的支持， 亦感激大家能够接纳艾妞并且锺意佢。

实不相瞒，一开始接到艾妞呢个角色时，我有啲担心甚至乎系抗拒。
因为「 #艾妞 」喺剧集中前半段嘅角色设定，系一个风骚、贪钱、同不断为钱而去讨好男人嘅人，试问一下，有边个会锺意呢种人啊。

人人都想自己出身高贵，唔使睇人面色做人，唔使哀求人，唔使时刻担心会流离失所，可以永远过住丰衣足食嘅生活啊。可惜，生活系现实嘅，为咗适应环境同生存落去，佢需要带住虚伪嘅面具，对住人笑，只想赚多啲钱令自己有安全感，因为呢个世界冇人会保护佢为佢著想。
如此真实的社会写照。

当佢终于遇到对自己真心真意嘅人，可以唔使再虚伪，可以真实坦诚去面对呢个人嘅时候，上天却选择带走咗佢。或者人生根本就系一场充满欢乐悲伤艰难同崎岖嘅旅程吧。

佢会喊，佢会觉得伤心。
但最后佢选择带住微笑，坚强哋去继续所有挑战， 因为地球唔会因为悲伤而停止转动，太阳照常会升起，日子一样要过，虽然伤痛依旧存在。好认同佢嘅一句，喺边度跌，就喺边度企返身

拍完呢套剧之后，我成日都喺度谂，人生唔似剧集，30集就完结。又有几多人会真系用时间同心思去慢慢了解同认识另一个人呢？

经历咗半年「艾妞」嘅人生，我发现用「有头发边个想做癞痢」呢句说话来形容艾妞嘅人生非常贴切嘅。「 Don’t judge a book by it’s cover」唔好单凭外表去判断一个人的全部。可能呢个就系「艾妞」会选择唔理会其他人嘅评价，想笑就笑，想喊就喊，不愿束缚自己情绪，只为珍惜自己嘅人而付出嘅原因吧。

今次，我尽了百分之二百的努力去饰演「艾妞」，因为演员永远都系度等个机会， 等一个唔知几时先会嚟到嘅机会， 等待一个被接纳、被认同嘅机会，等一个下次唔知会否再出现的机会。

一切如过眼云烟，喺曲终人散之后一切将恢复平静，
学习「艾妞」继续微笑住坚强地迎接人生嘅挑战 #艾妞是打不死的小强
#希望明天的结局是大家最期盼的
#杨秀惠
#有种情叫爱情
#有种情叫亲情
#有个熟悉的地方叫家