【金马55】泛泪夺男配 袁富华入行30年：我好锺意演戏

袁富华当演员30年，在电影《翠丝》演出亁旦「打铃哥」的他，首次提名金马男配角更勇夺奖项。激动泛泪的他上台拿过奖项后，心情仍未平复，感言：「紧张咗成个月啦，终于尘埃落定，都冇谂过有咁嘅结果，因为从来做演员领略到谂个因唔好谂个果，唔系就做得唔开心，个因就系我好锺意演戏，所以坚持咗30年。好多谢金马奖评委对我嘅肯定，唔止肯定我值得攞呢个奖，亦肯定我廿几年前继续做演员嘅决定系冇错嘅。」

袁富华直言攞奖似发梦：「喺香港做咁多年舞台剧演员，只系攞过一次舞台剧男配角奖，提名男主角都好多次，每次都系同个奖擦身而过，我承认冇乜奖命。红姐（惠英红）成日都提我唔好咁紧张，对住金马奖唔紧张就呃你嘅。都好多谢天下一公司，对支持我哋呢啲名不经传嘅演员真系不遗馀力。」

至于庆祝活动，袁富华表示回港后仍要排练舞台剧，未有想法，「攞咗呢个奖更加要专注工作，做更好嘅角色，要再畀心机，希望返到香港再慢慢安排。」