全家出动拍MV 张新悦宣布佗第4胎：一不小心又有咗

41岁的张新悦淡出幕前多年，与老公育有3女，一家5口幸福美满。今日她在社交平台上载短片，宣布「我又怀孕 」，更搞笑承认今次「一不小心又有咗」，话老公冇做足安全措施。

张新悦自己作词，搵埋老公同囡囡齐齐拍MV，在片中坦言：「近日好多人发现我拒绝佢哋嘅活动邀请，尤其是夜晚嘅派对，好似好支持但系又唔出席。更有人觉得我好唔畀面佢哋，唔同佢哋饮返杯酒，想藉著呢个自编自导自演嘅『电台』访问，我想讲声抱歉，呢3个月嚟令大家有所误会。」张新悦改编旧歌《一不小心》为《一不小心2018大肚婆》，唱出「一不小心又有咗罗，感觉很惆怅，明明话3个够，点知俾老公呃咗」、「腰酸骨痛朝朝想吐」、「无厘头天天在发福」。

作为3小孩之母已经好难，张新悦亦冇谂过又多个考验，笑指「#生得太多有点儿闷唱首歌仔调剂下心情 #10几年冇唱歌自家制作唔好嫌弃#送给所有大肚婆和妈妈听」。她接受传媒访问时直认完全冇计划过生第4个，心情有点惆怅，不过都要乐观接受事实，老公则非常兴奋，已谂紧BB改咩名。