喜夺「我最喜爱男歌手」 陈柏宇宣扬开心之道

陈柏宇（Jason）搣甩「隐世歌手」的称号，去年开始人气急升，更在昨晚的《叱咤颁奖礼》拿下男歌手银奖及首夺「叱咤乐坛我最喜爱的男歌手」，他在台上也开心落泪。今日凌晨5时许，Jason在社交平台贴出奖座相，撰下得奖感言及宣扬开心之道。

原名为陈广伟的Jason留言：「我系陈广伟，亦系陈柏宇。喺2018年1月1号嘅呢一日，我成为咗世界上最开心嘅人。原因系我真正感受到为人哋而开心嘅乐趣，因为我真正了解到我做歌手嘅原因，系为咗可以令到更多人开心。方法唔系唱歌俾（畀）你地（哋）听，而系用做歌手作为一个途径去认识更加多人，张（将）我嘅谂法向一个一个人咁宣扬开去，目的系要令到大家都可以同我一样咁开心，一样咁感受到唔系凡事都要为自己出发先可以得到快乐。如果我为自己而开心，机会系，只有我自己开心。但如果我为人地（哋）而开心，咁起码已经有两个人开心（一个我，一个人地（哋））。
条数点样计落，都系后者著数啲。再睇远啲，如果每个人都系为人地（哋）而开心，就有可能全世界都开心。我知道一定会有人睇到呢到已经觉得我扮嘢，『呢个世界，边有咁嘅人吖。』但我可以话你知，咁系因为你唔愿意去相信，呢个世界会有唔自私嘅人。又或者好不幸地，你未遇上过一个咁嘅人。系有架（㗎）！我唔系第一个，因为我能够有呢个谂法，都系我身边嘅人教我嘅。我唔系最后一个，因为我相信，每个人，终有一日，都可以做得到。我相信你地（哋）！我系陈广伟，亦系陈柏宇。喺2018年1月1号嘅呢一日，我成为咗世界上最开心嘅人，因为你地（哋）开心。」