著老西射住大光灯 梁汉文热爆拍MV险中暑

梁汉文（Edmond）除忙于本周五六两场演唱会彩排外，还一口气为几首新歌拍MV，其中最新派台歌《你哪位》就在赤柱污水处理厂拍摄，当日户外温度摄氏34度，现场加上大光灯照住，穿著一身西装的Edmond体感高达40几度，热到几乎中暑！

Edmond说：「我今次真系俾导演Jason考起，为咗拍出嚟效果特别啲，将呢首本来已经系快歌再将节奏调快多一倍，到调返正常速度时，画面就会好特别，辛苦晒同我一齐拍摄嘅演员，一齐热一齐步伐要快。因为要拍大头对嘴，嘴形一定要夹，所以我预早一个星期系咁背歌词，日背夜背，急口令咁，连瞓著都嘴郁郁，困扰咗我成个星期，结果拍完大家都好满意！」其实困扰Edmond还有一件事，他笑言：「事前导演话喺污水处理厂拍摄，我惊会好臭，又热又臭仲要死背歌词，真系好担心，结果嚟到现场一啲都唔臭，环境好好，只系大光灯照住好热！」 为配合歌词，Edmond与几位型人在MV里齐齐扮串样，他说：「为咗配合呢首歌叫《你哪位》，即系『你边位呀？』做人有宗旨、唔卖账、好有态度，辛苦大家热到咁仲要扮串、扮型，结果拍出好有power嘅感觉，超额完成！​​」