唱K晒恩爱　杨明情不自禁咀庄思明

杨明月前拍摄剧集《抱佣情人》时，就被发现同有样有身材、演开妹仔角色嘅郭千瑜态度亲昵，继而传出杨明暗沟对方。当时女友庄思明就话，绝对信任男友肯定冇越轨举动同思想。有指杨明o依家无论去边都会同女友报告行踪，令佢开心又放心。

其实，呢对小情侣拍咗拖一年几，感情已经相当稳定，两个仲不时喺社交平台放闪，更加系行到边咀到边嗰只，真系烟韧到晕！日前，杨明拍完新剧，于是同女友飞去马来西亚度假，唔好以为佢哋拣去亚热带地区，就一定系去海滩同阳光玩游戏。对于锺意夜夜笙歌嘅杨明嚟讲，晚黑去唱下K、饮下酒，先至啱佢口味。 现场所见，庄思明单独唱歌时，杨明就会猜枚自娱；当镜头一转，佢两个合唱嗰阵，首歌一有停顿位，杨明就要咀嘴，肉麻到身边朋友冇眼睇！