陈百祥帮陈法蓉人工呼吸　睇到网民嗌救命：仲扮后生谈情

王晶监制的无线剧集《赌城群英会》，风格、剧情令唔少网民都送上负评，话似足8、90年代嘅《精装追女仔》、《赌圣》，虽然桥唔怕旧，但网民实在唔多受。

噚晚播到第7集，「是旦哥」陈百祥（阿叻）一直保护住「 十三妹」陈法蓉，有一幕系陈法蓉返到屋企哮喘病发作，仲晕倒地上，阿叻去到对方屋企，见佢面青青冇乜意识，就帮口做人工呼吸。之后嘅剧情老套，阿叻送陈法蓉去医院时遇上车祸，撞到阿叻个头爆缸，最后无事无干又去到医院，包晒头又伤脚嘅阿叻坚持照顾陈法蓉，结果女方深受感动。 对于66岁陈百祥同50岁陈法蓉「Kiss Kiss」，大部份网民都话顶唔紧，「阿叻唔擅长拍呢啲爱情戏，对话语气又唔够深情，带唔到观众投入」、「觉得陈法蓉几惨，同阿叻kissy kissy」、「阿叻咁老，仲扮后生谈情.....」、「救命，一把年纪同陈法蓉谈情」。