烂身烂势住笼屋　邓兆尊拍新片收6位数酬劳　

邓兆尊近年淡出娱乐圈，相隔8年之后，早前再接演一部网络电影《失业皇帝2017》，好多人认为已故「祥哥」新马师曾遗产剩落大把，邓兆尊一定唔忧做；不过，早排祥嫂（洪金梅）又话，兆尊高调晒3个女友，系想搏曝光搏复出喎。究竟兆尊系唔忧做，定搲捞呢？ 投资《失》片嘅老板向展邦、向展威两兄弟向《东周刊》爆料话，系自己主动接洽邓兆尊演出嘅，有少少系因为睇到邓兆尊呢排嘅新闻，想搵个有份量同有啲名气嘅演员，好自然谂起佢。加上安排邓兆尊演住笼屋靠卖旧电器维生嘅「财哥」，无论外形同感觉，邓兆尊衬晒个角色。向氏兄弟仲话，今次搵邓兆尊一共拍咗4场戏，酬劳有6位数。邓兆尊都好易话为，冇喺价钱上计较过，可以话大家系一拍即合。

在拍摄现场，邓兆尊扮演笼屋居民，因为被大集团逼迁，而著晒「血衫」抗争，睇佢烂身烂势，演得都好投入。邓兆尊话今次拍戏，最想睇吓依家同以前有乜唔同：「依家啲拍摄手法唔同晒，两部机一齐拍，唔使由朝等到晚。同埋后生一代嘅演员，我都唔熟，可以乘机了解吓佢哋，有乜新思维同埋新谂法。」