【谢氏揈蕉法】霆锋爆老窦攞蕉扮枪　谢贤揈前「咪一咪」蕉椗

谢霆锋主持内地节目《12道锋味》，日前网民在节目中搵到唔少搞笑位，例如炮制淋过毛巾嘅鸡蛋仔、在食物前磨刀加「鐡粉」等，当中霆锋无厘头chok爆揈蕉，令网民搲晒头「点解唔可以好好地搣蕉皮？」 原来揈蕉有段故，《12道锋味》的面书专页上载霆锋同老窦谢贤（四哥）在漫天飞雪下，拎住成大梳蕉，讲解点解要揈蕉，并搞笑Hashtag「#带住黑超fing住蕉 #既然咁多人问 #谢氏fing蕉法」。 霆锋一开波就话：「我一定要解释畀你哋听究竟呢个香蕉系点嚟嘅，即系点剥吖。」然后霆锋望实四哥问：「你记唔记得我细个点样引我笑，教我开香蕉先？」冻到震腾腾嘅四哥猛话唔记得，霆锋再解释儿时四哥攞起香蕉当揸枪，扮西部牛仔氹自己及阿妹谢婷婷笑，仲大赞四哥开蕉开得好有型。 霆锋一边讲，四哥一边玩揈蕉，仲分享心得，指揈蕉前要先在香蕉椗位用手指公「咪咪佢」，整开蕉皮先能够揈蕉，可惜拍片用的香蕉太生太硬，讲明熟的蕉皮先至容易揈开。 讲开儿时两仔爷的相处点滴，霆锋一轮嘴大爆四哥的型棍事，有徒手开合桃、用匙羮及、筷子完美起原个椰青肉。霆锋讲到眉飞色舞，心入面明显赞叹四哥的「绝技」，仲讲定下次要分享四哥起椰青肉的片。揈蕉段片引到万二个Like，网民留言揈蕉故事好Sweet，亦有人笑指「四哥好冻喎」、「四哥喺个仔面前变乖猪」、「 两父子企埋一齐后兴奋程度好似两个大细路」。