石天欣无端涉诈骗　疑身份证遭盗用

早已离开TVB的石天欣，去年7月与圈外男友Jacob结婚，嫁过美国做在职师奶，搞吓网购生意做埋Youtuber拍生活日常。近日身在美国的石天欣自爆，住在香港的妈咪收到CID电话，致电的「罗sir」竟然话石天欣牵涉一宗诈骗案，仲叫石天欣去旺角警局搵罗sir。电话骗案咁多，呢件事就搞到石天欣头都大埋，质疑「真定假？」 石天欣烦上加烦，因为石妈妈又接到另一名「苏警长」电话，仲上埋门搵石天欣，但屋企又冇人，于是又叫石妈妈去警署协助调查。知道妈妈如此频扑，人在美国的石天欣忍唔住爆Seed，唔想烦到妈咪之馀，亦觉得警察处理手法有问题，「我受够，到底想点呀？ 有无人可以话我知到底人喺境外，又想知自己有咩案件可以点？讲啲又唔讲啲咁，其实可唔可以check下出入境先？ 可唔可以上网做下research先？朱经纬啲案，好多案都唔查，反而唔辛苦去到我屋企门口，因为我叫自己香港人？ 我系咪要坐洗头艇？我洗唔洗搵个律师同我妈咪去？我受够！到底边个想玩我？玩就嚟同我玩，唔好玩著我呀妈。」 原来石天欣被查一事属实，有指石妈妈已到警署了解事件，怀疑石天欣的身份证被盗用，石天欣仍然处理事件中。