Tesla销售数据分析 股价挑战500难唔难？｜晋佳
2024-12-31 15:15 
2024年最后一个交易日，最值得回顾嘅系，美股市场规律喺一年间，变化嘅速度比过往为快，其中一个能够谂得到嘅原因，或许系AI正在加快改变市场。
喺之前10月至11月份，美股公布今年第三季业绩，唔少业绩发布后嘅市场反应出乎投资者意料之外，即使业绩曝光，都估唔到股价系升系跌，反应变得更随机。最经典莫过于Tesla（TSLA）10月23日公布业绩，收入逊预期而每股盈利胜预期，翌日股价上升22%。或许市场已经洞悉到第四季Tesla喺中国嘅销售继续畅旺，能够预早预测第四季收入上升、同时成本下降嘅双利好形势，配合一连串好消息包括特朗普胜选、自动驾驶FSD V13.2推出、FSD准备进入中国市场等等利好因素，将股价推高至接近500美元水平。
不过，近期开始感受到Tesla股价转弱，连日跑输博通（AVGO）及英伟达（NVDA）呢两只市场资金竞争对手。
快公布第四季交付数据
嚟紧假期后嘅1月2日，Tesla将会公布第四季交付数据，目前市场预测交付量为51.2万辆，较第三季增长2.8万辆，而中国市场喺10月及11月已经按年增长2万辆，假如中国继续增长势头就至少符合预期？但数据显示Tesla由上海厂房出口嘅数字显著下跌，唔排除喺中国市场以外嘅销售表现一般，为销售数据带来变数。
今次交付数据亦会影响市场对于Tesla在1月下旬公布业绩嘅睇法，目前市场预期每股盈利0.96美元，比起近年最低季度每股盈利0.45美元，反弹逾一倍，同时股价由今年首季公布业绩前低位亦已回升2倍，可以话，目前股价充分反映业绩反弹嘅因素。
Tesla利好消息喺过往两个月连珠爆发，即使自动驾驶及机械人业务带来长远憧憬，但目前能够支撑股价继续上升嘅子弹减少，而Tesla同英伟达（NVDA）嘅股份成交差距亦一路收窄，假如后者出现好消息令股价上涨，亦会抽走Tesla资金，令Tesla股价受压，要1月再挑战500大关，难度不低。估计喺1月下旬公布业绩之前，除非FSD进华方面又有利好消息，否则仍有机会等待Tesla更低水平吸纳，反而英伟达系更好嘅短期选择。
晋佳
相关文章：
最新回应