专栏 Will知足球｜一球成名变糖衣毒药

世界上独食而好波嘅球员多不胜数，穆斯亚拿、利莱辛尼等等。不过经历完刚周五晚，发现原来独食而唔好波亦大有人在，佢就系白礼顿中场祖利奥安施素。

大家都记得佢射入曼城嘅世界波，的确系天外飞仙，不过眨下眼都已经过咗两季，原来佢颗粒无收，而且出场时间亦都好少，难得佢喺星期五晚主场迎战宾福特时正选披甲，即刻睇一睇佢嘅发挥。结果安施素简直就系一粒毒瘤喺白礼顿身上，全场每次一攞到波就独扭，望到龙门就马上起脚，唔讲以为睇紧漫画《Blue Lock》，上半场单计佢一个人已经8次起脚，成为今季英超首39分钟起脚次数最多嘅球员。

去到下半场，领队靴士拿都顶呢位攻击中场唔顺，战术上都唔再集中中路组织，改为分两边边路推进。而当安施素走去左边路攞波时，完全拖慢咗进攻节奏，而且扭到死晒先交，去到78分钟左右已经自己烧乾自己，最后毫无悬念被调离阵。

一球世界波令到世界上嘅球迷记得佢，但如果表现继续系咁，就算佢系好后生，都好难再喺英超见到佢。Willhappy