专栏｜彭马缺阵车路士玩完？

车路士将会喺今日主场摆下擂台迎战阿仙奴，讲到呢场伦敦打吡，车路士近6场都系未赢过，成为阿仙奴嘅专属出气袋，咁究竟蓝战士点样可以扭转乾坤？

赛前车路士军容雪上加霜，高尔彭马唔知踢唔踢得，传闻话要唞3个礼拜，对于「Palmer FC」系一个大打击。咁后备有边个可以用呢？其实小弟真系想睇到尼干古多啲落场嘅机会，尽管今季上阵16次攻入10球，已经多过上年，但球员表示好似经常无正选，情况继续系咁，下季一定会走。呢位球员季前论正选估计系佢，但系一路畀尼高拉斯积逊压住。

尼干古近呢两季上阵时间真系唔多，一来受伤患困扰，二来一路都唔受教练重用，但系你叫佢交货真系交到，尤其是今季对般尼茅夫后备上阵，只系好短时间就可以入波帮助球队绝杀，的确系令人留咗深刻嘅印象，大家唔好忘记佢当年喺莱比锡都系孭飞嗰一位，表现都系好出色。

即管睇下今日车路士可唔可以靠尼干古，食住近期个气势，喺阿仙奴身上抢分。Willhappy