Joey公开梅启明虐儿证据再报警指控重婚 梅妈养成儿子酗酒习惯发酒癫又家暴丨独家
2024-10-31 07:00 
因工伤官司败诉后欠讼费未付，遭前雇主入禀高院申请破产的梅启明，早前宣布跟泰籍女友查颂美（May May）结婚，惨被离婚的马籍老婆Joey嬲到爆炸，向《头条日报》提供报案纸，指控有酗酒习惯的梅启明家暴及虐儿，有关证据及男方宣布重婚片段已向大马警方报案。Joey提醒曾于大马宣誓结婚的梅启明：「港马两地重婚属刑事，最高刑罚要监禁7年。」另外，Joey又公开梅启明发酒癫事件，件件都非常乞人憎。采访：曾盻坚
56岁Joey本是梅艳芳海外铁粉，当年因为追星「好幸运」认识到梅家两母子，更被梅启明疯狂追求，Joey说：「当年我唔知咁多嘢，讲到美国返嚟有几惨，我只系听佢嘅版本咪俾佢呃到罗，佢口甜舌滑，除咗May May外，仲有好多烂桃花，包括另一个泰妹及交往多年嘅富贵女人。」
饮醉酒推儿子落地
Joey跟梅启明结婚12年，两母子受尽对方冷暴力，唔系发酒癫就为咗泰妹失理智，她更爆梅妈宠子，以往一箱一箱红酒买返屋企，每晚开两枝「餸饭」，个仔饮到酩酊大醉，养成酗酒习惯：「一家3口住跑马地时，Richard(儿子)只得5岁，梅启明饮到醉醺醺经常踢门大叫『开门』嘈住隔离，又话要生又话要死。」Joey唔畀梅启明继续饮更遭梅妈阻止，甚至帮口，「有乜理由唔畀佢饮酒㗎？唔饮酒似咩男人呀？」
2022年1月1日，梅启明涉虐儿而报警，Joey说，「当晚佢醉晒上嚟我哋住嘅酒店，送寿司畀个仔食，行去厕所时跌咗封信落地，我叫阿仔嗱嗱声执嚟睇，原来系泰妹嘅精神科覆诊信，佢为抢返封信推个仔落地，撞伤咗阿仔只手，我为咗保护个仔就报警，因为唔想元旦坐救护车去医院(同阿仔验伤)，最后备案了事。」事后警方将个案转介社工跟进，但梅启明唔合作，社工冇符只能不了了之。
呃母子回港睇楼盘
同年2月10日，Joey再向警方求助：「留港期间，每晚同阿仔去梅妈租住嘅城市花园，要梅启明返嚟煮饭畀个仔食，佢饮咗两杯就手持菜刀喺厨房大大力斩嘢，啪啪声连家佣都吓亲，我同阿仔惊到匿喺房，后来报完警就开门冲落街，梅启明拎住红酒樽跑住尾随，好彩警方及时到场将我哋分开，警员见冇损伤就收队。」Joey为保护母子，返回大马后即向当地警局备案。
另外，Joey又爆梅启明发酒癫乞人憎事件，试过大力拍打两母子的酒店房门，更大声话：「我要陪个仔多啲，我好锡个仔。」又试过唔开门就发癫打烂门锁同酒店啲嘢，「有啲赔偿了事有啲报咗警，酒店都有晒纪录。」长期受到精神虐待的Joey更被恐吓，称梅启明不时跟她说，唔好搞泰妹，「唔好踩亲佢条尾，佢真系癫㗎！」梅启明又试过扮改过，但被笃爆速逃，「去年8月，佢话租咗跑马地一个唐楼单位，叫我哋返去睇租盘，到时一家3口一齐住，又安排个仔留港升学，点知去到发现系白撞，地产经纪都唔识佢，梅启明被踢爆后发晒癫，一枝箭咁冲落街再冲上电车，阿仔追住佢几乎被车撞，可能佢怕我尾随知佢住边。之后就玩失联，就算阿仔伤心到发高烧都冇理。」Joey狂闹梅启明系『X街中X街』，家用又唔畀走去玩女人，糟质到个仔病。
大马重婚监禁7年
Joey强调只系想个「X街」负返老窦责任：「佢仲够胆同个仔讲『爸爸梗系唔系玩女人啦，咪听个『癫婆』讲，𠵱家爸爸拍紧啲嘢』真系黐线。佢搞到阿仔左右为难，知老窦做错又唔想妈妈追究，屈咗两年猛话心口痛、气促，梅启明两母子真系极品。」自宣布同泰妹结婚后，Joey曾多次致电梅启明，但都联络不上，故她只能透过《星岛头条》对梅启明讲：「喺大马、香港重婚属刑事，好大罪，最高刑罚要监禁7年，你要记得曾喺大马宣誓，打锣打鼓话要结婚，口噏噏当秘笈呀？𠵱家大马份份报章都有大肆报道，大马政府会保护人民，唔会放过你。」最后Joey向梅启明「赠兴」：「May May陀衰家喎，呢头高调话再婚，嗰头梅妈就被破产。」
最新回应