徐天佑太太店铺遭硬闯拍摄！撰长文直斥：同强奸冇分别 坚称不存在「拍完唔啱数」
2024-10-23 17:43 
前男子组合SHINE成员之一的徐天佑太太Olive Wong在中环九如坊开设护肤品牌概念店，昨日（22日）突然在IG出po称被电影公司在未获批准情况下硬闯拍摄，直斥该行为「同强奸其实冇分别」！《风再起时》导演翁子光亦有转发并说：「有人利字当头，中饱私囊！」
相关阅读：黄德斌孖叶童演舞台剧唔排除加场 徐天佑做治疗师教身心灵系统课程 导演陈德森都系学生
徐天佑太太店铺被电影公司硬闯拍摄：
徐天佑太太Olive Wong昨日在其护肤品牌概念店的专页撰长文，声称「限时伤心post分享」：「话说早前有电影公司联络九如坊店，想借用我哋场地拍摄某某贺岁片，我哋清晰回覆佢哋需要逐小时计的租场费用，以及如果有任何损毁都需要佢哋负责，佢哋回覆咁佢哋嘅器材工作人员唔会入嚟，只系演员入嚟兜几个圈好快就出返去，我哋回覆都需要借用场地1小时嘅费用，因为冇共识所以我哋就没有多加理会。」徐天佑太太称昨日同事见到店外门口set好机，工作人员、演员等等准备就绪，在店外拍了一段时间：「店内其实有客人做紧Facial休息紧， 同事即刻出去交代清楚唔可以入嚟我哋店内，我同佢哋讲『如果佢哋拍出边我哋都冇办法啦』。」
结果竟然发生不愉快场面：「突然工作人员放低咗个对讲机喺店内门边，两位演员无啦啦走咗入嚟兜几个圈，个对讲机突然劲大声向演员发出指令，演员又好大声咁讲对白。大佬！我哋上面有两位客人休息紧㗎！店内工作中嘅同事完全反应唔过来，之后佢哋又再次入嚟做同一样嘅事，有crew仲要话我哋同事影佢哋相，搞到我啲同事好惊。系，成件事其实只系短短10分钟，但呢10分钟嘅『夹硬嚟』同强奸其实冇分别。」
徐天佑太太还说：「我哋已经前前后后好多次讲过唔可以入嚟拍摄，平日我哋有无数人入嚟影相打卡，我哋会好开心嘅，但今次事件完全系商业用途，在商言商，就系要计数，我哋打开门做生意，每天交着高昂嘅租金人工水电媒，你哋请个临记都要封番封利是啩？！点解可以咁过分嘅？有冇礼貌㗎？有冇程序㗎？」最后她只这间制作公司的名并説：「套戏我唔知系边套，话系贺岁喜剧，我亦都唔想讲明系边位演员，因为其实唔关佢哋事，这样的制作团队，难怪港产片每况愈下。」
徐天佑出身于组合Shine：
徐天佑太太称不涉及「拍完唔啱数」
事件随即在网上掀起热话，有人说：「畀一个钟租场都畀唔起，要咁厚面皮夹硬拍，应该要开佢哋名，唔系既会整臭香港电影个名，应该互相尊重。」、「记得keep闭路电视记录，有乜事都有证据。」、「真系唔知点解永远拍嘢嗰班人，次次喺街都要摆晒款，老冯觉得霸住条路系啱，仲要觉得啲行人阻住佢哋。」甚至有人问：「点解唔阻止佢？企几个人喺度咪得？再唔系报警？冇主角喺度嘅相做证？似拍完唔啱数多啲。」徐天佑太太亦有回覆：「已阻止（但夹硬入嚟）/同事有工作岗位（小店只得2个sales)/报得警来佢哋已经走咗/有主角照片及CCTV片， 但唔想造成无理网民骚扰演员，所以这一刻选择唔po‧。因为问题及责任在制片及制作团队/所有条件在拍摄前清𥇦交代，佢哋不愿意付租场费用，所以我哋唔畀佢哋入店拍摄，简单如此，不涉及『拍完唔啱数』。」
导演翁子光称有人利字当头中饱私囊
《风再起时》导演翁子光亦有转发并说：「香港拍戏总是预算有限，明白的，为省钱可以做很多说起来羞涩的事，可能是为了电影的制作著想，但是某电影制作公司，以拍摄本地制作为名，制作成本左悭右悭，结果是有人利字当头，中饱私囊，肉眼可见的把制作做到尴尬的因陋就简，而且这种短视的作风，仍可长年不停有新片推出，香港电影业形势严峻，为拍好戏而努力的心，相信其实就是良知，以我所知知、也感动于香港电影工业九成人都是有这底线的，希望极少数（甚至是一间）这类制作单位不会影响香港电影工业的形象。」
其他文章：
40岁歌手英国回流变「身心灵疗愈师」！初阶学费每位XXXX元 已开近百课堂
最新回应