梅启明妻Joey公开被「遗弃」过程怒斥：人渣 爆梅妈畀钱个仔玩女人供合照证冇分居6年丨独家
2024-10-18 07:00 
梅启明在已故天后胞妹梅艳芳的61岁生忌，宣布将与泰籍女友查颂美（May May）结婚。惨「被离婚」的第二任老婆，56岁马籍Joey嬲到癫，向《星岛头条》提供4年前的家庭照反击分居6年的说法，更重整时间线公开梅启明处心积累遗弃两母子，被呃返大马的过程。Joey直指梅启明是「咸虫、X街贱男，死穷鬼」，亦认同香港人睇法「梅启明真系人渣。」Joey强调唔会离婚，更强烈要求梅启明同儿子交代。采访：曾盻坚
Joey越讲越嬲，大爆梅妈多年来都有畀钱梅启明玩女人，每次「食完松」冇手尾跟，但今次遇著马籍霸气妻，对佢作出大控诉：「佢玩女人玩得开心，拍箩柚就走，但今次遇到我咁嘅恶人，我唔会离婚放生佢，除非佢畀足赡养费，仲要亲口同个仔讲『我唔要佢』」Joey透露当初梅启明答应过囝囝阿B，话「爸爸用个心嚟锡你，唔会唔要你。」她又奉劝男人有本事先好出去玩女人，明串老公好废，「畀到家用就出去玩到够，咪当畀分手费买个自由罗，唔系好似你咁死穷鬼！」Joey又爆梅启明处心积累呃两母子返大马：「2021年8月佢畀你哋(《星岛头条》)影到同泰妹拖手行街；10月份我冒住疫情隔离3周都要返港，用私己钱租酒店6个月，准备搵法援告佢通奸，期间每晚带个仔返去城市花园(梅妈)屋企食饭，当时梅启明就死狗咁晚晚煮饭𠱁个仔，但煮完饭就鸡咁脚走，搞到个仔爆喊。」
然后2022年3月，梅启明写悔过书认错及承诺同泰妹分手，「佢要求和好重新嚟过，关系回暖；到5月时梅妈唔再续租约，叫我哋一家3口搵地方搬，仲畀咗20万梅启明搬屋，佢乘机打发我哋返大马，讹称『搬定咗接我哋返去。』」Joey等咗近3年，「每次个仔打畀佢，佢就大声话『你咪听只「发瘟」(Joey)讲唔要你啦，爸爸唔得闲做紧嘢呀。』」Joey痛心表示囝囝等到凌晨先打畀爸爸，但梅启明一样唔听。「佢所有都系大话，今年初我返港去咗湾仔警署报警寻人，帮个未成年儿童搵老窦，后来佢终于现身，但见到个仔走都走唔切，惊我交返个仔畀佢，自此就block咗我电话喇！」
泰妹帮梅妈剪指甲
Joey非常怨恨泰妹，仲话见到佢个假样就想呕：「佢话有法术上到梅姐身，所以梅妈好锺意佢，咁老人家梗系易呃，尤其梅妈好锡个仔，泰妹会帮梅妈剪指甲，第一次上去就买成千蚊果篮。年前泰妹喺梅妈身边打畀我，大声夹恶话『你信唔信我代梅妈打你？你冇大冇细唔服侍奶奶！』」Joey坦言心直口快所以梅妈唔锺意佢：「梅妈从冇畀过一毫子我，但我都唔稀罕。」知梅妈想抱孙，Joey曾兜口兜面同梅妈讲「点生呀，生到你个仔咁呀！三岁定八十，你觉得个仔会变返好人？」直至结婚10年40岁高龄才为梅家生仔。而Joey不在港期间，梅启明亲口向她承认做『阿妈世界』，「庆幸上天保佑我个仔又叻又乖。」
儿子屈到病唔开心
Joey对梅启明冇晒感情，但心痛个仔挂住爸爸屈到病：「自2021年拖手事件后佢就伤心到今时今日，话『周身骨痛、心口痛、透唔到气…』佢系优秀青少年，钢琴及芭蕾舞获奖无数，𠵱家冇晒笑容及自信，又见佢翻睇父子旧相，梅启明真系人渣中人渣嚟。」因为岁数问题，Joey只能做补习老师赚钱，两母子只能住劏房：「同佢讲都冇用，佢话知你瞓街。」对于梅启明重婚，Joey不屑说：「我真系恭喜佢呀，梅启明个咸虫，记得提佢去精神科覆诊喎。」Joey透露意外知道55岁泰妹都要定期睇精神科：「梅启明曾亲口同我讲『泰妹热情又风趣，冧得我及阿妈开心，而且系我嘅同道中人(亦要睇精神科)。』」
最新回应