Gao首演双性恋兼暗恋大20年Uncle冇难度 强尼自豪打边炉买料达人15分钟搞掂丨独家
2024-10-14 07:00 
结缘于《全民造星IV》的Gao（沈贞巧）@COLLAR及强尼（许博文），在ViuTV新剧《出租大叔》首演父女，第2次拍剧的前者要演绎双性恋，甚至暗恋父亲老友陆骏光（嗱渣），Gao好叻女唔觉太难拿捏。问到若然提供出租服务可以做啲乜，两人都对可提供的技能非常自豪，一个是打边炉买料达人，一个是放狗专家，香港人咁鬼忙，应该真系有得做。采访：杜杜 摄影：朱伟彦 形象:Daniel Cheung、Natalie Lin 发型:Ricky Lam化妆:Cathy Zhang 服装:Sandro Paris
51岁强尼跟Gao相差20岁，事实真系生得出，所以不用冲破心理关口，「中学同学啲女都已经系律师医生，毕业出嚟做紧嘢，所以冇呢个包袱。」剧中强尼早年离婚，Gao就跟妈咪去了美国生活多年，父女再碰面有好多误解同冲突，他们庆幸早已认识，演对手戏有帮助。
Gao成长充满爱
因为有强尼做爸爸，加上陆骏光、张达伦等「大叔」相助，令初任主角的Gao冇咁担心，「有佢哋陪住我，用佢哋嘅行为show畀我睇应该要点做。」而强尼知道Gao演自己个女亦安心咗，「可以好直接同佢沟通，唔需要兜圈，出面嘅演员就要由头开始认识，。」
Gao认为演「林玛莎」最难是成长环境跟她有很大分别，「我不嬲见到嘅大人都好有爱，冇乜出现单亲或好不负责任，成长环境都充满爱。」而父母对她做任何事都全力支持，是跟角色的最大分别，「我读书差啲，但系父母冇迫我要几多分或者读到啲乜嘢，反而好支持我做锺意嘅嘢，由我跳舞开始，佢哋每个骚都会嚟睇，我成长环境唔算好富裕，但系好幸福，同『林玛莎』超级唔同，佢即使跟咗妈咪去外国读书好有钱，其实唔幸福。」
强尼好崇拜老窦
讲到角色是双性恋，跟李敏有段情，亦会暗恋老窦好兄弟、大叔级的陆骏光，Gao就演得好Free，「『林玛莎』唔会太care性别上嘅嘢，会比较着重爱嘅感觉。因为细个时有感被遗弃，青春期好孤单亦好渴望有人爱佢，当李敏个角色出现，佢冇care佢系男定女，好想得到爱，好想要个屋企。」强尼搞笑搭嘴，「先到先得，哈哈！」至于要暗恋职业诗人的大叔陆骏光，强尼一听即狂笑，「哈哈！sorry我唔应该咁笑！佢系诗人。」Gao跟陆骏光初合作都有点担心，但接触后已放下心头大石，「『嗱渣』本人好大差别，佢系好搞笑，第1日讲嘢佢就好friendly，好在暗恋嗰啲戏，唔算好明显，唔会有好尴尬或者唔知点算好嘅情况出现。」
强尼演的「林木森」跟个女关系差之馀，跟高翰文演的老窦亦是火星撞地球，「佢觉得老窦有嘢欠咗佢，到有毛有翼仲唔反咬你一口，加上Gao又憎我，但阿爷锡佢嘛！」不过现实中他跟爸爸关系就非常好，「阿爸阿妈好后生结婚，老窦22岁左右就生我，佢系好温和嘅人，我哋冇嘢需要拗，由细到大都觉得老窦好权威，佢讲我就会听，细个已当佢系role model，佢会踢波又有好多friend，我大个都要咁，结果我真系好多朋友，锺意踢波。」
最强买餸及放狗
《出租大叔》讲述一班大叔提供不同的出租服务，强尼觉得可以出租买餸服务，因为买餸可以长知识，「平时你净系食之嘛！去到海鲜档，虾有咁多种㗎？！菜又有咁多款，所以我好锺意去街巿。」至爱打边炉的他，必亲自到元朗街巿入货，「屋企打边炉打得好密，我坚持要自己买餸，其实我工人已经好好，但系我都锺意自己拣。」而每次必入手本地手切肥牛，「基本上每次去系机器式去嗰几档，一开始摆低钱畀牛肉档转头去攞，跟住系海鲜，15分钟就买完打边炉嘅餸。」强尼笑言打边炉冇手切肥牛好失色，「试过几次牛肉档冇开，买啲雪藏嘅会唔开心。」
Gao除可出租擅长的教跳舞外，还可以帮人放狗和凑仔，「我锺意同小朋友、小动物相处。」强尼亦见证过她趁拍剧空档返屋企放狗，「佢好劲㗎！朝早06拍到3点，跟住嗰场冇佢份，佢飞返去放完狗再返嚟。」Gao认为放狗好减压，「见到佢笑，我会更加开心，等我放工到时未必想陪佢行，下午行天气好就更开心。」而凑BB一样难不到她，「最细帮人凑过2、3岁嘅BB，帮佢换尿片、陪佢玩，同埋教跳舞时有教过4至11岁小朋友。」不过1岁以下她就未必够胆凑，「我冇凑过，都有啲惊，软淋淋咁。」
最新回应