朱咪咪见尽发姣女艺人争上位 入行半世纪庆幸冇男人缘劝同行带眼识人丨独家
2024-10-12 07:00 
本月26日朱咪咪将「登七」，虽自称又奀又唔识交际嘅艺员仔，但能捞到今时今日拥有香港、星马10个物业，过亿身家，超劲。她最自豪25岁时冇知名度，胆粗粗只身来港唱酒廊，更赚到第一桶金及识到老公马坤。入行多年，咪咪姐见尽圈中光怪陆离事，妹妹仔嗲声嗲气勾搭人夫时有发生，「食过夜粥」的她坦言：「见得太多喇…」采访：方骞平
近年朱咪咪长居新加坡享儿媳福，之前她返港，为深水埗一间老字号金行的酒楼晚宴唱足两晚，咪咪姐以港姐音乐伴随出场，叉住腰的她边行边搞笑地说：「朱咪咪芳龄18，三围38、22、68，坐得好稳…」之后在台上唱《飞跃舞台》、《千个太阳》、《禅院钟声》等，边唱边跟观众互动，大搞气氛，HIGH爆全场。
疯狂接JOB暴瘦10多磅
迎来70岁的咪咪姐依然大把世界，近月忙到冇停手，做完酒楼Show后再到澳门及美国演出，另外又去佛山跟洪金宝拍电影《功夫少年》，对于被指暴瘦现「树根颈」，她中气十足解画：「成个月忙住做嘢，系瘦咗10几磅，咁跑法蛇到死啦，但我精神、精力好好，夜晚唔食淀粉质系好好嘅，我呢个年纪瘦啲好过痴肥，更何况体重Keep住110多磅，『树根颈』系影相角度问题，相中我个头侧侧哋，条颈点会冇事呀？」
摆款新人出入成堆助手
咪咪姐唔识Social，人脉唔算多，但工作认真，所以有好多翻头客，故不时买埋礼物到老人院义演：「台上做嘢我绝唔马虎，台下有目共睹嘅，所以多年嚟观众都咁支持我。个天锡我，我锡老人家，𠵱家状态经已心满意足。」咪咪姐坦言只系一个艺员仔，冇资格摆款，单人匹马去美国登台，唔使要求住几千尺酒店总统套房，更笑言，「我怕黑㗎。」讲到排场问题，入行几十年的咪咪即变咪咪姐爆秘密：「大把后生艺人摆款啦，出入要有『皇朝马汉张龙赵虎』，呢班多数系签咗经理人合约，𠵱家唔系要争取知名度签经理人，系要用排场嚟提升地位去接Show，咁各取所需啫，而我从来冇助手，仲可以贴钱做老人院，因为我觉得实力重要过排场。」乐得自由的咪咪姐唔介意在TVB一年只得6个骚：「一个人只要冇要求样样都会顺啲；否则达唔到要求会好唔开心。」
冇男人缘原来行好运
另外，对于55岁郑梓浩被前女友Grace大爆「食软饭」7年，期间又搭上内地「小三」，及被孙耀威人妻妹妹孙美贤包养，咪咪姐说：「情骗呢啲唔分男女老幼，不过，我好好彩由后生都𠵱家都冇乜男人缘，老公以外，喺新加坡只交过1至2个男朋友，婚姻以外嘅都系桃花劫，以我副尊容冇乜人埋嚟，冇烂桃花系福气。」咪咪姐更直言陌生人要埋身攞著数唔容易：「要记住，交友唔好有多一层关系，包括钱及性，借出去啲钱好难收返，我悭悭埋埋，辛苦工作嘅血汗钱系留畀两个仔，老公有嘢做唔使我养。」咪咪姐见过圈中唔少为上位发姣嘅女艺人：「哗！呢啲多的是啦，以前唱夜场见过啲『囡囡』向人夫，挨身挨势嗲声嗲气发功，最后都成功搭上咗，我哋做呢行见得太多，但就算知都唔会理，我有我生活；佢哋有佢哋忙碌；事不关己己不劳心。」
最新回应