《痛爱完成式》睇到面红自虐爱情片丨头条戏场

一套戏的男女主角不和会否影响观众入场意欲?用数字答你，《痛爱完成式》制作成本只需2500万美元，截稿日票房去到3.35亿美元。男主角Justin Baldoni身兼导演，而女主角Blake Lively亦系监制，两人拍到连朋友都冇得做，更懒得扮冇嘢，连一张为电影宣传的合照都冇，讲真几好笑。电影属阴公爱情片，同样有童年阴影的两男一女主角爱得死去活来，戏名都话咗畀你知，痛爱呀。戏外反目成仇，戏内难舍难离，当然要入场食吓花生啦。(上映中)撰文:廖思慧

天台一幕，睇到面红甜笑，我讲我呀。

佢就系神经外科医生Ryle，亦是本片导演Justin Baldoni。

Ryle胞妹开入伙P，Lily亦被邀请，饮多两杯出事咯。

电影改篇畅销爱情小说，女主角Lily (Blake Lively饰)自细受父亲家暴妈妈影响，童年非常唔快乐，嬲老窦格衰，更嬲阿妈太懦弱，大个女即刻搬走， 然后跟好靓仔的神经外科医生 Ryle (Justin Baldoni饰)一见锺情，睇样都知男方多女埋身亦唔会认真，难得佢亦承认只爱玩一夜情，但因为好爱好爱Lily，茶饭不思，连工都唔想返，咁鬼靓仔玩深情，仲要flirt女技巧可以用教科书级形容，特别是两人天台初见面一幕，睇到全程嘴角向上，事后先知Blake Lively老公，即「死侍」Ryan Reynolds有份度，难怪导演再嬲多啲。

为安抚呷醋王Ryle，Lily喺街𠱁咗好耐。

Lily戏服好靓亦好多样化，做监制自肥都好正常嘅。

Ryle同Lily拍拖场口好好睇，睇到心猿意马。

Blake Lively虽然生咗4个小朋友，但状态依然好好。

全片系咁锡锡
《痛爱完成式》属典型美国爱情电影，剧情好简单冇转弯抹角，讲述原生家庭创伤对子女成长有几大影响，Lily想搵个脾气好嘅另一半，偏偏锺情脾气突然暴躁的Ryle，仲有初恋男友Atlas (Brandon Sklenar饰)突然出现，三个主角都好靓，乜都唔做企喺度已好赏心悦目，谈情说爱好甜，冇沟通有误会好惨，三个人兜兜转转，好似中学生睇嘅爱情小说，又甜又滞但又睇到会心微笑。

少女Lily同初恋男友，两人都生于家暴家庭。

大个嘅Lily重遇初恋男友，剧情开始肉紧。

Ryle怀疑Lily偷食所以好嬲。