亨仔Jason近女色好惊青：惊俾佢哋Fans追住打咋 ROVER Lolly Talk首合演音乐剧多𤓓事丨独家

ROVER跟Lolly Talk的阿妹（黄敏荞）、Elka（郑芷淇）和Sinnie（吴倩怡），以及Eelyn（陈伊霖）首合演音乐剧《重拾：10分钟》。各人轮住讲难处，Kim（卓金乐）跟Eelyn自认跳舞屎，阿妹、亨仔（陈镇亨）及Jason（雷濠权）表示最难拿捏感情戏；阿妹更笑住投诉亨仔唔敢正眼望住佢；Jason亦自首唔敢同Eelyn有肢体接触，𠵱家啲Band仔真惊青。采访：杜杜 摄影：林宾尼

（后排左起）阿妹、Elka、Sinnie＠Lolly Talk及Eelyn和（前排）ROVER，只有Eelyn演过舞台剧。

Eelyn感激阿妹、Elka和Sinnie，经常帮她练舞。

阿妹、Elka已上了1年半戏剧班，比较易上手。

ROVER处男演音乐剧，认紧张又大压力。

密集式排练后，ROVER攰到瞓晒喺地。

 Jason自《全民造星V》后，久未跳舞，「我哋系夹Band唔系男团，少接触跳舞，虽然我同希晋跳得唔错。」问到是否骨头硬晒？Jason笑言：「应该Kim比较硬！」众人即起哄笑Kim骨头脆，又问使唔使补返啲钙质？！非常小学鸡。希晋更爆料：「佢话膝头哥痛！」大家又指Kim是甩舞担当，他无奈话：「跳舞真系有啲难度，郁手都好啲，郁脚郁极都郁唔到，记step好难。」Jason再补一刀，「基本上你系冇甩，因为你都冇跳，哈哈！」Kim解释：「跳舞真系渣啲，但有尽力去跟，奈何老师觉得我弹bass好睇啲罗！」

被笑骨头脆的Kim，耐心解释记唔到舞步原因。

Kim自认渣，记舞步及走位完全搞唔掂。

互选甩漏之最

互选漏歌词之最，大家直指亨仔，他就无奈解释，「我好容易紧张，因为唱歌有演技嘅部份，呢样嘢都拿捏咗一段时间，有时甩歌词，因为个脑谂紧点样加啲戏落去。」不过希晋就唔接受亨仔解释，后者笑言：「信唔信我演出时甩畀你睇，讲笑！𠵱家好好，已经梳理咗个脑，演出绝对冇问题，好有信心！」至于甩台词之首，亨仔继续胜出，他再解释又是紧张累事，「紧张仔嚟讲，甩嚟甩去好正常，但几次大排练已经好顺，大家甩得最多系第16场，我哋每个人都有甩。」他们解释16场是大团圆结局，多人甩漏机率自然特别高。虽成为甩漏之王，但亨仔的执生能力亦提高咗，「排练时有个位讲我太激动要抒发情绪，点知我成个跌低，即刻做掌上压扮冇嘢，好专业坚持演出，但佢哋笑到黐咗线。」Kim和Jason称该场戏亨仔需要踢走张櫈，「我哋仲讨论紧好惊佢踢过嚟，估唔到佢跣低咗，哈哈！」

亨仔被大家选为甩歌词和台词之冠，个样几无奈。

大家对剧本时，亨仔都好专心。

唔系怕女友嬲

阿妹和亨仔有感情戏，前者就投诉好难入戏，「一开始认识佢好怕丑，唔系好讲嘢，有啲位要深情对望，佢眼神就会好闪缩，但有2个月时间排练，越嚟越熟，𠵱家冇问题，眼神冇再闪缩。」亨仔解释并非要顾虑女友感受，「系惊俾佢啲Fans追住我嚟打咋！」他又感激阿妹主动帮手，「阿妹一开始有尝试撩我讲嘢，叫我唔好咁紧张，做就做啦，𠵱家都好咗，多咗时间相处都Friend咗好多，基本上冇乜尴尬。」至于戏份亲昵程度？亨仔答得风趣：「喺7点半电视播得，所以大家应该会睇得几开心，儿童适宜。」

Eelyn和Jason，以及亨仔和阿妹分别演一对。

亨仔同阿妹经过两个月排练，熟晒唔尴尬。

惊有肢体接触

Eelyn跟Jason演一对，事前约法三章要做「不尴尬情侣」，前者更赞后者好专业，「我哋完全唔认识对方，一开始好惊有感情戏，又怕有肢体接触会尴尬，但埋到位，尴尬场面比想像中少好多，非常多谢呢位拍档，畀咗我十足信心。」Jason亦最担心肢体接触，「我哋会揽，我唔知点就个力度，第1次同异性对戏，惊太大力揽会唔会整亲佢，排咗几场大概知点样做好啲。」Jason亦不担心女友诈型，「完全冇问题，我哋都系非常专业嘅演员。」除咗揽揽外，会否有更亲昵戏份？众人就大卖关子。

Eelyn和Jason望住唱歌，几有Feel喎！

Jason终于够胆同Eelyn有肢体接触。