力臻自爆学生妈咪做埋fans club行政成员前中学阿Sir狂晒40寸胸女Fans沉晒丨独家

2024-08-24 07:00

签约Sony旗下厂牌「Green Music」的29岁力臻，曾是中学数学老师，近年凭40寸胸及28寸腰倒三角爆肌身材及宠粉行为，搞到大量女Fans沉晒，在社交平台疯狂出Po赞好正，就连fans club行政成员都是中学学生的妈咪，他笑言非为吸纳粉丝才操大只。成为妹猪Fans新宠的力臻首谈恋爱史，更公开感激女友瞓身支持，有样又大只，识唱歌教过书仲要咁深情，你玩晒啦！采访：杜杜发型:Zanki Ng 化妆:Queenie Chan

力臻40寸胸肌和28寸腰的倒三角好身材，确实好吸引。

力臻今年推出第2首派台歌《我的课本留白处》，作为送给学生的最后礼物，因为唔想说教味太重，最终搵填词人Oscar帮手，「我唔用说教形式教学生，以过来人身份分享多啲，希望佢修饰得冇咁说教，但又有啲message，有种同行感觉。」讲起跟学生相处点滴，他最难忘Last Day返学校，「有个中三学生抛个篮球畀我，叫我『阿Sir埋斋』，畀咗个好靓嘅句号，都感动到眼湿湿，教书咁耐总有学生唔锺意我，但开心有正面影响到啲学生。」

力臻以往唱快歌较多，《我的课本》是他少有的抒情歌。

力臻一直努力分开老师和歌手身分，就算离校前一日都拒绝同学生签名及合照，「我会话唔识呢个人，呢个边个嚟？！」他现在是补习老师，承认有学生已变成粉丝，亦有粉丝慕名报读，「唔止学生，仲有学生家长，fans club嘅行政成员，系中学学生嘅妈咪，佢会带埋囡囡睇骚，走嗰日都收到啲家长message，话支持我。」

《我的课本》MV，力臻搵来教过的学生演出。

Show胸唔一定色情

未听过力臻嘅歌，都应该从网上平台睇过佢副40寸胸肌及28寸腰倒三角爆肌Body，力臻觉得场地适合就去做，「沙滩show，唔通着樽领咩？！」热爱健身的他，认为艺人keep fit是尊重观众的专业表现，并非为吸纳粉丝，「有时做gym，都会问自己点解会做，系为咗畀人睇定变成生活一部份，呢个好紧要，否则好容易跌落病态，影响饮食习惯同健康就唔好。」

力臻出席《TheNextwave XX24》沙滩音乐节，跟Michael C除衫演出。

对于粉丝Focus佢副「靓偈」，力臻觉得冇所谓，「从艺人角度，唔系做每样嘢都要做个role model，健身、健美，除咗性感嘅靓亦系健康嘅运动，自律性嘅表现，骚个body唔系色迷迷嘅表现，要令大家想法转一转，睇身形唔系色情。」力臻的男女粉丝比例各一半，男粉会飞日本睇骚力撑，骚身材后又多了大量女粉丝，「like数都差好远，呢个系流量密码！」女粉急增但力臻未曾收过疯狂示爱，仲教大家如何温柔地向偶像表达爱意，「好简单，影完我再喺IG story打句『佢真系好正呀』，tag埋我，咁我已经睇到，唔使直接send过嚟话『你好正啦』！」

力臻的fit爆身材，亦得到广告商垂青。

女友力撑做埋助手

谈到恋爱史，力臻拍过4次拖，最长一段由中学拍到入行，足足10年，「我哋同一间中学、大学，后尾仲一齐住，到我入行佢都尽量support我，但始终唔同行业。」2017年他本有机会出道，但爸爸突然病逝只能放弃，2021年再有机会他特别紧张，觉得事业行先，「当系二次人生，会摆得好高，一定要做到啲嘢，但有时夜返屋企，佢（旧爱）会有1、2句说话畀我听，就算我理解佢，都会影响心情，我嗰时做全职老师，收工再做艺人，做啲嘢未必有钱，仲要处理佢嘅情绪，有少少分歧。」

力臻大方谈情史，又大赞女友有正职都帮佢做小助手。

力臻庆幸遇到现任女友，身体力行支持他在娱圈工作，「佢做法律有关工作都好忙，但都会做我小助手，我出活动或者做骚，佢一放工都会喺后台帮我影相、补妆，畀到我好大支持，呢个好紧要。」他又认为自己非靠外形吸引女友，「从来唔系大家选择对方最重要嘅嘢，尤其呢个年纪又一齐住，屋企都唔系依家个样啦！」不过他承认𡃁仔时期会先被外表吸引，「中学时觉得拍拖要拣个靓，所以点解咁长嘅感情，未必去到最后，因为被对方外表吸引，但相处落未必适合。」

BOX粉丝沉晒事件簿

Threads有好多歌颂力臻嘅Po，香港嘅爆肌男歌手越嚟越多，乐见呢个现象。