「折骨」Ben转做独立歌手年底出自创歌 再战舞蹈赛自爆冲凉拉筋度桥最有效丨独家
2024-08-22 07:00 
《全民造星III》冠军「折骨」Ben（赵祥诚）离开旧公司后沉寂一时，最近终有新搞作参加《第二届Red Bull Dance your Style跳舞比赛》，望透过比赛令更多人认识折骨舞。为备战他笑指连食饭冲凉都周身郁，更自爆冲凉时拉筋和度桥最有效。计划年底出自创歌转做独立歌手的他，访问获家姐和参加《声梦传奇2》妹妹Maggie（赵颂宜）撑场，他透露一家人都爱唱歌，他自小靠陪妈咪唱粤曲培养唱歌兴趣。采访：杜杜 摄影：谭志光 场地:Boogie Renaissance Studio
Ben解释虽已出道，但对跳舞热情不减，决定今次再参赛，「好多人或者屋企人会同我讲，你跳舞咁激烈好易受伤，但我觉得趁仲后生试多啲，加上呢个比赛着重表演性，系我专长，唔系纯粹Battle对战，仲有同观众互动，做啲好炸嘅招，睇到其他国家开始搞时已好想参加，但之前撞咗其他嘢，今次终于参加到。」他坦认参赛仍有压力，「最大挑战可能有啲人都睇过折骨或者跳舞，都要做到新嘅方式畀大家睇。」他想胜出代表香港去印度再战，「由细到大都好想代表香港去做啲嘢，特别今年睇到奥运跳舞都系运动，亚洲嚟讲跳折骨嘅人唔算多，希望可以带到多啲呢种表演方式畀佢哋睇。」
到学校教学生跳舞
参赛前Ben做了不少准备，除听多些不同类型歌曲，无时无刻练舞亦不少得，「一有时间就会跳，甚至食饭、冲凉都会周身郁。」食饭周身郁妈咪唔闹？他笑言：「佢可能睇惯咗，已经唔会讲啲乜嘢。」他又解释比起练习，反而花更多时间度桥，「到时要即兴，DJ打歌系唔同style，要谂点样应付，反而要谂更多嘢。」而他认为冲凉时构思效果特别好，「唔知点解冲凉对于我系个好大嘅启发点，之前《造星III》有round做恐怖片，我都系冲凉时谂出嚟，可能好静畀我去谂嘢、放松，同埋冲凉时拉筋会有效啲，哈哈！系自己习惯。」
去年约满寰亚后，Ben花了很多时间到学校分享及教小朋友跳舞，他很享受这种传承的工作，「可能只系1、2次workshop，但好开心分享自己识嘅嘢，又可以等啲学生去尝试吓。」提到《全民造星V》的邓家杰受他影响爱上折骨舞，他觉得这件事很神奇，「𠵱家都唔系好接受到，人哋会因为我而改变，好不可思议，我成日觉得自己表演冇乜意义，呢2、3年好多人同我讲，令我有好大转变，开始相信自己做嘅嘢，我可能就系呢个角色，做一啲人哋唔做嘅嘢，亦影响到我参加呢个比赛。」这些鼓励说话，除了屋企人讲，还有一班《造星III》的战友，「旨呈佢哋同我比较近，会close啲，对我鼓励好大。」
增自信做独立歌手
自信大增，亦令Ben够胆向独立歌手发展，更尝试创作歌曲，「储埋都有8到10首demo，之后会出。」他认为独立歌手形式更适合他，「好似跳舞咁，我好多嘢都系free style，适合多啲自己设计，唔知啲歌大家锺唔锺意听，但对我嘅创作都有少少信心，希望完成到1个专辑或者一啲作品，心愿系畀自己谂法大家睇。」他透露创作曲风比较另类，「可能我有啲反叛，想做啲暂时好少人做嘅嘢，或者贴近啲国际或欧美巿场嘅曲风，好似我跳折骨舞咁，当时冇人睇过，冇出现过我就好想去做。」他已有时间表重返乐坛，「有1、2首歌差不多做好，差少少就可以推出，希望今年内会得。」
访问当日，Ben由有「城巿画家」之称的家姐Elaine（赵绮婷）和妹妹Maggie陪同到场，他大赞已做回他经理人的胞姐能干，「佢都好劲，有自己工作，画画上面嘢，同时会兼顾屋企大大小小嘅嘢，顾掂自己外，仲顾埋我啲嘢。」而出任小助手的妹妹，他就赞她参加《传奇2》后令她刮目相看，「佢性格好似我，比较内向，一开始比较担心佢呢个性格，好似人哋担心我一样，但呢个担心系多馀，原来上到台会有惊喜，佢把声喺女仔入面算系低音，可以咁有特色，最近仲扮嘢，佢原来可以做到咁多嘢，收收埋埋好多技能，我系十分支持佢，佢每round比赛都有问我，大家交流比赛心得，佢嘅进步真系好大。」
Ben有计划跟妹妹合作，「有谂过现场表演，我可以帮佢伴舞。」他们亦想过合唱，甚至MV都拍埋，但觉得未够靓，「净系喺屋企拍，都系拍好啲先，我哋不断喺屋企练歌，帮对方和音，我哋把声衬到都几好玩。 」原来他一家人一向都爱唱歌，「可能畀妈咪影响，妈咪锺意唱粤曲。」他更负责陪妈咪唱，「我会唱任剑辉，背就背唔到，如果有得跟住歌词都可以唱晒成首。」有聚会时，他还负责跳舞助兴，「本来我唔会，但系我妈咪会叫我跳吓，个气氛就会开心啲。」新年时几兄弟姐妹还会有特别贺年节目，「我哋新年会整啲贺年歌拍畀妈咪睇。」
最新回应