TVB御用恶人彭皓锋直肠癌3期常有便意影响生活 见证癌母经历怕做化疗：一做就走咗丨专访
2024-07-22 09:00 
现年53岁的「TVB御用恶人」彭皓锋去年7月证实患上直肠癌第3期，直肠内有一个约5厘米的肿瘤，因位置接近肛门，假如接受切除肿瘤手术的话，很大机会终身背著造口袋！一度停工休养的彭皓锋，小休过后再度出发，虽然目前与肿瘤并存，不过精神状态基本上分别不大，刚刚在马来西亚拍剧回来的彭皓锋接受《星岛头条》专访，坦言今次行程令他「谂通咗一样嘢」！
相关阅读：53岁TVB恶人患直肠癌肿瘤忽大忽细暂拒开刀！由便秘变每日X次便意 肚泻竟是先兆
患癌彭皓锋透露最新身体状况：
访问当日，彭皓锋刚由马来西亚拍剧回来，他独自一人精神抖擞的到达访问地点，假如没有看过近日关于他患癌的报道，实在很难想像他确诊了直肠癌第3期，目前仍在治疗中！彭皓锋坐下不久，便急不及待想分享一个经历：「嗰啲心态系好重要，唔好一嚟就觉得自己搞唔掂，而家好多人话cancer搞唔到，但系咪一定会有事呢？又或者系咪睇完一定会冇事呢？其实唔会，呢样嘢系唔知，系经验问题，我阿妈之前都有cancer，佢最初系喉癌，电疗之后好番，隔咗几个月又话复发，扩散咗去肺，跟住一做化疗做走咗，所以系我一路冇做化疗嘅原因。」彭皓锋又说：「而家我嘅肿瘤系细咗，叫做好转，我系咪用而家嘅方法keep住去维持呢？呢个都系一个选择，我唔系唔信西医，而系惊我自己嘅体质未必可以接受化疗，当然可能而家嘅化疗药系好咗，我排咗期去做。」
彭皓锋受肿瘤影响频去厕所
彭皓锋今次去马来西亚拍剧，在短短的4天，竟然令他「谂通咗一样嘢」，他说：「平时我坐喺度1、2个钟就想去厕所，但系今次我去到马拉，化完妆出发之前去一次厠所，直到食晏嘅时候先再去，跟住到5、6点收工前都唔使去， 可能我成日记啲对白，个人嘅专注力去咗第二度，唔会谂住要去厕所。」原来受肿瘤影响，彭皓锋在日常生活不断有signal要去厕所，他说：「因为越近肛门就系咁样，分辨唔到系肿瘤定系大便，只系话畀你知嗰度有嚿嘢喺度，所以呢个系我分享嘅小小经验，我唔知有冇用，平日唔好当自己好辛苦，你个人搵啲嘢寄托，乜嘢都好，打机又好，搵啲嘢写下都好，打麻雀都好，畀个脑去谂下第二啲嘢，唔好畀个signal影响，好似我而家要成日去厕所，每日差唔多去10次厕所，如果喺屋企，我可能成日要摆住厕所，虽然系有得去，但系唔多，每次只系去少少，我，但系喺马拉拍戏点解咁奇怪唔使去呢？呢个可能系思路问题，因为要记对白，不停咁去谂，唔知关唔关事，但系都系一个体会。」
彭皓锋乐观面对病魔
自从患癌消息曝光后，彭皓锋突然间多人认识，除了有传媒邀请访问外，连出街都有不少人问候，他说：「虽然我唔想讲嚟讲去都系关于患癌嘅嘢，但系谂深一层，宣扬啲正能量系好，我试过拜神嗰阵有人叫加油，去覆诊又有的士佬车过嚟话加油，讲真有病又好、冇病都好，最紧要系开开心心，做人意义都系咁样，日日搵钱好辛苦，都要搵嘢令自己开心。好似而家我咁嘅情况，你当佢冇得医，我日日喺度担心，用咩方法搞好佢？咁我咪日日喺度愁？ 咁不如开心啲，我有老婆仔女，不如同佢哋开开心心，就算我走咗，佢哋都有啲开心嘅回忆，而唔系对住个老窦，觉得佢好惨，又有病，又要愁家用。我而家知道自己体力上系乜嘢状况而去接嘢做，我之前嗰一年都可以，但系因为屋企人担心，惊我太操劳，我而家嘅体力系冇之前咁好，我开完工会好攰，咪返去酒店就摊咗喺度，唞够第二日就开工，本来都谂过慢慢操返自己，好似试过去跑步，但系跑几步又急急地，唯有慢慢行。」
彭皓锋与家姐彭家丽互相扶持：
眼前的彭皓锋与萤幕上穷凶极恶、为利益可不择手段、积极进取的角色形象不同，镜头后很多事情都「睇得好开」，彭皓锋淡淡然地说：「做人谂太多冇意思，个天其实有安排，嗰阵离开TVB，冇埋HKTV，个个都以为我搞唔掂，我感受咗好多人生百态，感受到人嘅现实。我离开TVB之后去咗HKTV，点知发唔到牌，其实我系第一个走，我嗰份经理人合约系00001，系第一批开荒牛，但系我都系公司同艺人第一个讲搞唔掂嘅人，嗰阵未讲话个牌系出唔到，我份约系2月尾完，但系佢哋系6月公布批唔批。」彭皓锋过档后工作量大减：「我一年只系做咗5个骚，去到第9个月，嗰阵因为经理人走咗，咁我咪同公司其他人联络，点知佢哋唔知原来我有经理人合约，跟住仲话过年之前啲角色已经安排好，未必『摄』到我入去，仲叫我自己上去睇吓搲唔搲到个角色嚟做，又话要搵吓我份合约究竟系点样。」
彭皓锋获HKTV知会否不获发牌要减薪
经过一星期的研究后，彭皓锋终于得到公司的回覆：「佢哋话原来我真系有经理人合约，本来话安排过年后嘅工作，点知1月就话我哋个牌应该出唔到，要CUT2/3人工，咁我就话唔好倾喇，唔使养屋企咩？嗰阵好多人话返唔到TVB，咁我咪喺度捱，有一日send个message畀黑妹姐，问吓佢有冇啲骚可以带埋去做，佢二话不说就叫我出去倾，佢真系好好，去边都预埋我，有阵时啲骚仲系佢自己拎钱嚟钱畀返啲车马费我哋，真系冇人会咁样做，所以一路好多谢佢，到三个月后小青姐（梅小青）就搵我拍《卫子夫》，识咗啲内地制作人，慢慢咪喺内地发展。不过都多谢嗰个经理人，如果唔系佢，未必可以捱到今时今日。」
彭皓锋不觉人生有起跌
彭皓锋这一次是人生的一大转变，但他不觉得自己的人生有起跌，他笑说：「我都冇起过，又点会跌？有阵时啲嘢谂嚟做乜？系帮唔到，唔系你谂就得，真系要随缘，你红唔红唔红，人哋畀唔畀机会，唔系我想就得，都要睇监制、老板锺唔锺意你，导演拍嗰阵有冇唔舒服，就算嗰啲人锺意你，但系套戏唔爆，又或者爆完冇嘢跟尾，咪又系冇用，我以前未有cancer嗰阵都系咁谂，但系嗰阵啲人话我灰，其实只不过系有啲嘢你预计咗，但系控制唔到咪放低佢，而家多咗个cancer，咪觉得好似好正能量。」
彭皓锋深信会康复
目前患癌的彭皓锋仍在观察阶段，他表示：「喺我角度唔会谂住系拖罗，我会谂医紧，会医返好，啱啱发现嗰阵，老婆叫我乜都试吓，但系我觉得试得就要信，唔可以一次就搞掂，都要啲时间我，我啱啱做完检查，初初发现系5点几cm，都大㗎！之后一月份去check 8点几cm，但啱啱又check一次，就落返去7cm，我都排咗期会去做化疗同手术。」至于目前的财状况，彭皓锋说：「冇谂过，暂时系有几多用几多，支持唔到咪食少啲，睇医生冇计，唔谂咪唔烦，唔够钱咪唔睇住，演员又被动，我又唔红，拍一部可能只系捱到2、3个月，咁我咪有得拍咪拍，有得唱咪唱，好多嘢唔系我控制，仲有能力捱到咪去罗，我嘅本份系话畀人知我仲接到嘢，仲开到工，接到咪开心，接唔到都冇办法。」
摄影：朱伟彦
场地提供：Dazzling Cafe (The ONE)
其他文章：
卢惠光商天娥等群星为一人庆生！患癌「御用恶人」携妻到贺 肿瘤近肛门恐要开造口
最新回应