专栏│橙军要破防 空袭土耳其

深宵衰波真系极为难顶，今时今日人类有咁多娱乐作选择，球迷仲能够坐在电视机前睇英格兰、法国等闷蛋至极的足球，非常值得尊重，个人则认为讲波的更值得歌颂，若果仲要讲着好似法国对比利时呢种无限轮回的衰波，真系地狱级考验，若果场波系自己个人做直播，我一定会中途终止节目。

有观众问我，「你锺意意大利，咁意大利唔衰咩？」嗱，意大利自己唔叻啫，咪连波都唔要，畀对手攻罗，对手攻唔入都会做到惊险镜头，无害人睇衰波喎。但英格兰、法国甚至平时曼城等控球能力强的球队，系生人霸死地，霸住个波唔郁唔攻，是不为也，非不能也，这才是我认为的Anti-football。

由意大利教头蒙迪拿执教的土耳其上场明知唔够奥地利打，唯有死守，全场被对手狂攻，好彩靠两个死球战术入两粒赢咗，其实亦唔系Anti-football，场波无闷呀，可惜上场入两球的功臣美列迪美罗就因为入波时做出有政治含意的庆祝动作，要停赛两场，连爆冷条件都无埋，打条铁咩！即使荷兰唔系好劲都系等死，甚至讲到高空波争顶，荷兰应该更强，今场就买荷兰上盘兼华基尔云迪积克首名入球。马高