《玩转脑朋友2》教你如何放过自己精读班丨头条戏场

2015年推出的《玩转脑朋友》全球票房癫收8.58亿美元，超可爱情绪主角加天马行空想像力，借5种情绪去讲成长，全片多处泪点，冇谂过一个得意动画会睇到老泪纵横，自此爱到癫咗。等足9年，《脑朋友2》去到更高层次，戏中女主角韦莉已经13岁，踏入青春期，大脑总部发生翻天覆地巨变，有新情绪专员加入，当中以好神经质的阿焦(焦虑)孭飞，本来被快乐主导的韦莉变成另一个人，不断质疑自己「我做得唔够好」，睇到一泡眼泪。(7月11日上映) 撰文:廖思慧
 

粉红色大只仔就系阿尴，动画版更似姜涛，全片得一句对白，粤语版由Jeffrey配音。

原有情绪专员被新情绪专员吓亲。

韦莉本来好快乐，但被新情绪搞到不断怀疑自己。

童年韦莉好快乐，因为由「脑朋友」阿乐领军，带住阿愁、阿惊、阿燥及阿憎，所有事都好正面，不过，今集有全新「脑朋友」登场，包括乜都担心的「阿焦」，成日觉得人哋嘅嘢最好的「阿羡」、生无可恋Hea到爆，主张躺平的「阿厌」及终日不知所措的大只仔「阿尴」，贴近人类复杂又细腻的情绪表现。

阿厌出镜唔多，如果同阿焦中和返啲，韦莉就唔使咁惨。

搞到韦莉失晒控，好内疚又扁晒嘴的阿焦话「我只系为佢好」。

可爱阿羡同样出镜唔多，但好得意。

因为韦莉仲细，好过瘾的「念旧姐」只出现两幕便被阿乐赶走。

得闲赞吓自己
青春期是成长必经之路，韦莉准备升中学，暑假跟老友获邀参加曲棍球营，因为面对崇拜的球队前辈，好想被选入球队，加上要同老友进入唔同中学，青春期的警示灯号响起，新情绪大举进入，阿焦为打造更好的韦莉疯狂改造佢，希望佢谂到自己唔好嘅地方再努力改进，但反令她不断自我怀疑，「我做得唔够好」是全片令我最难受的对白。最惨阿乐等遭到软禁，成为「被压抑的情绪」，见证韦莉变成另一个人，唔好啦。

全片有大量反思位，包括阿乐的觉悟，明白唔应该将负面记忆波封存，所有情绪都有用，唔需要否定自己嘅过去。另外，提供解决焦虑的最好方法就系好好照顾佢，最重要唔好同自己过唔去，接受全部的自己，再成为更好的自己。
 

佢就系曲棍球队前辈，韦莉为接近佢不断改变自己。

最爱呢幕，所有情绪专员揽揽大和解，大家都辛苦嘞。

阿乐终于接受阿愁，因为明白成长就系要学习拥抱不同情绪的自己。