黎振烨患蛋糕恐惧症：已戒甜 偷食朱智贤4年首开腔道歉望畀条生路丨独家
2024-06-29 07:00 
现年38岁港男出身嘅黎振烨，2020年4月被爆背临盆孕妻搭上TVB前小花朱智贤，两人去到山旮旯幽会，在车厢内偷食蛋糕甜蜜庆生，形象插水嘅黎振烨已在无綫「自然流失」。深潜4年的他最近「上水」，除向受害者道歉外，仲公开求情，望畀条生路，还自荐跟古天乐做牛做马。被追问𠵱家可有蛋糕恐惧症时？他呆一呆，说：「我冇食甜嘢好耐啦。」采访：方骞平 摄影：朱伟彦 场地：十八梦
黎振烨被封「翻版古天乐」，被爆偷食前受TVB力捧。时隔4年，已获老婆原谅的黎振烨发挥生产力「升呢」成为两子之父；至于37岁朱智贤去年9月已离巢外闯，而当日陪住女友出席认错记者会的谢东闵，继续留守做背后男人，不离不弃。
肉赤老婆被屈报料
月前黎振烨正式跟TVB完约变身失业大军，他坦言前路茫茫，好嬲自己：「作为自由身演员冇咗公司照顾，要重新寻找方向难免有一定困难，搞到咁旁徨，令自己咁麻烦真系好后悔，明明行到去山顶，点解我可以令自己受伤，碌咗落去谷底？仲要伤害埋爱锡自己嘅人！还幸仍有传媒关心我动向，唔算系最差嘅结果。」呢个大教训警剔他，做人要有自制能力睇清楚要点行：「唔好轻视价值观，咪以为自己可以横过到错误，原来最后有好多关都过唔到。」黎振烨最肉赤老婆仲要受委屈，误传系「车厢偷食事件」报料者，挺身强调老婆唔系加害者：「唔好伤害一位受害者！佢所有嘅嘢我都清楚。(事件中得4位主角，『加害者』已呼之欲出？)冇必要知啦，重点自己都做得唔啱，唔好怪人。我反而要多谢嗰个人，否则连个家都冇埋。」
自荐跟古老板搵食
至今黎振烨欠当事人一个道歉，他即尴尬地扯埋TVB高层曾励珍、监制陈耀全，甚至全公司嚟讲，表示要向所有受影响嘅人致歉…及后才补充对当事人的歉意：「我撇开唔讲呢件事对大家影响及经历系点，我系好抱歉，原先可以避免到嘅事情，但自己冇去避免，事件真系影响好大，令到大家人生留下有不必要嘅烙印，希望有关人都可以过返本身想过嘅人生及道路，事件总有一日会过去的。」他承诺会做好自己弥补缺失，更公开求情：「自己唔系一个聪明人，但唔会蠢到觉得经已冇事，可能系一生人嘅烙印，我只求一个机会畀我做好自己，冲淡一生烙印。」同时，黎振烨正学习面对自己，成为两子反面教材：「小朋友有梦想，作为爸爸会鼓励，但，如果连爸爸都因为逃避责任及过错，要放弃演员梦，就冇资格叫佢哋要坚持…我要畀佢哋知道就算要披荆斩棘，都要为做过嘅错事负责任，我宁愿筋疲力竭、七劳八伤，冇晒办法才会结束演员梦。」提到将来打算时，黎振烨指马死落地行，透露𠵱家家庭开支由老婆顶住，他跟朋友学做幕后：「我好热爱演戏，每个角色都好畀心机演，老婆亦会畀意见，佢都好锺意睇我嘅戏。除想做返幕前，创作、编剧及制作乜都想试吓，之前曾胆粗粗写过温情，科幻剧本，唯一唔识写爱情小品，但全部未达标。」眼见古天乐推出「新晋编剧学徒计划」，黎振烨大感兴趣自荐：「我好有诚意由低做起，跟古老板做牛做马，任劳任怨都得，不过，我唔知佢度门喺边，更加唔知有冇资格，始终做幕后只系门外汉。」
有自制力唔吼蛋糕
另外，清减咗嘅黎振烨自「车厢偷食蛋糕事件」后已戒甜，唔多吼蛋糕，问到系咪有蛋糕恐惧症时？他忍唔住尴尬笑说：「我冇食甜嘢好耐，少啲食啦，所以瘦咗，我唔为食，除非老婆要庆祝，想食就避唔到。」最后他慨叹人生好长，好难有一个完美冇憾嘅人生，但相信只要努力诚心去改，破釜沈舟一定做到想做嘅事。
最新回应