伍允龙唔敢直认笋盘：我唔系衰人嚟 凭「王九」弹起旧爱锺嘉欣高调赞好男人丨独家
2024-06-27 07:00 
《九龙城寨之围城》成为香港史上第2部冲破1亿票房电影，更有望登顶成为最卖座电影。戏中演大反派「王九」的伍允龙（Philip） ，亦人气急升，特别是谢票时被「不讲武德」观众偷袭后，高EQ回应获劲赞有修养。原来Philip早年宣传电影《恶战》已遇过类似情况，在美国教功夫亦试过有人上门比试，甚至搞到要报警解决。46岁仍单身的Philip，谈到旧爱锺嘉欣公开力赞笋盘，他却不敢直认只笑谓：「我唔系衰人嚟！」采访：杜杜 摄影：罗安强 发型:Calvin Yuk 化妆:Cosette Lee 服装:I.T
视郑保瑞导演为偶像的Philip，未知演「王九」有得见已开心，「佢以前拍《狗咬狗》嗰啲都睇晒，接到电话郑保瑞想搵我倾偈已兴奋，唔理佢叫我拍咩做咩，都会𦧲饭应，开咗3次会佢先至畀呢个角色我。」他最记得瑞导决定让他演「王九」后的一番话，「佢同我讲『你拍咗咁多年戏，伍允龙系边个啲人都知，今次试吓唔同嘅嘢，做咗个造型后，观众未必认得你』，我都好锺意导演咁样去处理角色。」「王九」的招牌笑声，瑞导早在他试造型时已构思，「佢叫我笑吓，试过要我再多啲，就搵到呢个啱嘅笑嘞！」不过他首日开工，仍未捉稳「王九」演法，直到第2日拍跟洪金宝去杀人戏，「嗰场戏cut咗，讲我好兴奋去拣啲武器去杀人，个笑容加强咗，好似去玩咁，见啲工作人员开始模仿个笑容同啲小动作，导演又好似几锺意，就知呢个方向系啱，真真正正搵到『王九』呢个角色。」
上门砌磋要报警解决
提到早前谢票时被「不讲武德」观众偷袭，Philip坦承以往去外地宣传时，都遇过类似场面，「我同安志杰演嘅电影《恶战》，外地谢票有个情况好似，有个观众举手想同我砌磋，司仪畀佢上台，有少少交流后，佢突然踢咗我一脚，跟住我话『好痛呀！承让承让！』，咁就解决咗个问题罗！」他认为做动作演员难免遇到这种「挑机」情况，要好小心处理，「净系一个方法可以解决，就系保持冷静，同埋判断个情况需要做啲乜嘢。」Philip在父亲伍绍华美国开设的「伍家国术会」任教时，经常遇到有人上门砌磋，「唔可以话踢馆，系啲人好奇啲功夫系咪work，通常有咁情况都会派我出去。」但他强调只会点到即止，「去到个阶段大家明白嗰个功夫就会停，了解咗我哋教嘅功夫系有效。」但试过父亲未开武馆，在其他武馆任教时要报警解决，「有啲俄罗斯嘅武术家，都高大，嚟想尝试吓我哋啲功夫，郁多咗有啲混乱，结果咪要报警罗！」
恨拍拖搵对象讲缘份
46岁仍单身的Philip，一班《城寨》拍档早前更为他公开招亲，他坦承恨拍拖，「都想搵返个女朋友，甚至搵返个老婆，不过呢啲嘢可遇不可求，搵一个适合自己嘅人，自己又适合佢嘅人，互相适合都系要靠巧合。」提到择偶条件，他直言：「最好就靓啦！」但重要都是缘份同感觉，「最紧要个女仔有爱心，锡我，大家了解同埋明白对方情况咁先可以夹到，所以要时间认识，不过要遇到先可以认识。以往拍拖同埋认识嘅女仔，都唔同类型，系感觉问题，有时要求某啲条件，但遇到个冇嗰啲条件。」谈到旧爱锺嘉欣以往少有提起他，最近出席公开活动却忽然高调赞他，他大方话：「之前我哋有个历史啲观众都知，咁啱佢出嚟做活动问系正常，我都好感激佢，好开心佢觉得套戏咁好睇，佢话觉得我做得OK系开心，始终都系朋友，任何朋友赞我都开心。」对于获锺嘉欣力证是笋盘，他笑言：「呢啲系人哋讲，我唔敢话自己系唔系，我唔系衰人嚟！」
最新回应