周家怡爆周国贤著孖烟囱要打底：惊我博懵吖《无人之境》首演夫妻拍亲热戏惊觉性别对调丨独家

2024-06-22 07:00

周国贤（Endy）和周家怡最近在ViuTV原创剧《无人之境》首度合作演夫妻，最初有担心，但因两人有太多相似位，好快就打破隔膜。虽然好啱嘴形，但家怡惊觉他们似性别对调，更踢爆拍锡锡戏时，著住孖烟囱的Endy竟要再加打底裤，令家怡搞笑大呻：「系咪惊我博你懵吖？！」。采访：杜杜摄影：谭志光发型:Vincent Yeung(家怡)、Eve Chiu(Endy) 化妆:Herman Ng(家怡)、Winki Tsang(Endy) 服装: i.t(家怡)

同样44岁的Endy和家怡虽然好夹，但难有发展，「我哋都好麻烦。」

Endy公道讲家怡够豪迈，令拍亲密戏更快进入状态。

Endy和家怡拍剧前并不认识，Endy形容「完全是两个平衡时空」，最初有点担心，家怡笑着追问他：「担心我虾你呀？」Endy否认：「我哋饰演呢对夫妻密度好高，感情要钻到好深，担心够唔够时间同对手咁短时间入到戏呢？！」但好快已令Endy放心，「第1次见面我几紧张，但即日见佢比较豪迈少少嘅一面，有少少热情，就放下心头大石。」家怡笑言：「最初我啲nice系掩饰我紧张。」

剧中两人演一对结婚10多年的平凡夫妻。

问到两人亲密戏尺度？家怡笑言：「有床上的戏。」

Endy和家怡为剧集首度合唱主题曲《模棱两可》。

夹到诵经方式一样

两人同在1979年出生属羊，却夹晒口供扮细个，Endy笑谓：「你03年，我91年嘛！」家怡说：「03年又太夸，啲人闹呀！九运嘛！91年OK！」问到点睇对方为人？Endy未开口家怡已话：「唔好赞呀！」Endy扮唔理，「佢演技好外，亦好可爱、娇俏，03年出世嘅人都系咁。」听到赞美声家怡笑指：「哗！够啦！飘起啦！」家怡发觉他们有太多相似地方，「佢无端端拎啲鼠尾草喺度熏。」Endy说：「我哋放饭，佢又拎罐辣椒酱出嚟！」家怡感到最神奇是连诵经习惯一样，「唔系诵咁简单（Endy：我哋系Rap！）真系好少有，我搵唔到呢行有人一样咁癫，《地藏经》系十三品就咁读都要个半钟，但我哋可以背。」

家怡笃信佛教多年，平日有诵经习惯。

2022年Endy宣布跟韩籍太太李美英离婚，回复单身。

家怡认同Endy啱嘴形，但性别却对调，「佢系女嚟，我系仔嚟，佢好鬼麻烦！」家怡踢爆拍咀嘴戏时，Endy竟要着打底裤，「男人老狗，着孖烟囱点解要着打底裤呀！？」Endy解释是舞台剧常用免露出个咪的「收咪裤」，家怡不理继续讲，「成日话系收咪裤，着咗落去明明条所谓收咪裤长过条孖烟囱，点会得㗎？！」Endy笑着再拆，「肉色，我有摄高㗎！」家怡越谂越不满，「谂返转头，真系怀疑你系咪惊我博你懵吖？！搞到我好似好咸湿咁！」Endy解释，「我哋企喺梳化上面油墙，梳化会激情过喺床，仲要着住孖烟囱锡锡。」家怡投诉，「所以你就打底，摄个嘢惊我摸你系咪？！岂有此理！」Endy唔识回应，但家怡检讨可能问题出于自己太主动，「拍呢啲戏知男仔会避忌，怕好易畀人话咸猪手，我要令对手放心，一定要好劲咁，嚟啦！哈哈！唔知系咪我落多咗两钱肉紧，佢以为我会咸猪手呢！？」Endy笑着否认，「我锺意温柔啲，你好粗暴呀！」家怡笑说：「我下次试吓温柔啲，over act少少，sorry！谂住令到你舒适啲。」

自认性格麻甩的家怡，嗜好有揸车。

Endy开演唱会都试过露肉，唔算惜肉如金。

认同坦白对另一半

讲完亲密戏，家怡担心观众理解错戏种，故事其实讲一般结婚10多年夫妻遇到的问题，跟访问气氛完全相反，感觉较沉重，而其中一场冲突戏令他们最难忘，「好夸，有10几页纸对白，我哋唔系舞台剧，剧集、电影未试过咁多页纸，仲要得两个人，拍足一晚好攰，心力交瘁，条气好似开咗刀破咗咁，喊到对眼睁唔大。」Endy感激拍完这场戏后，单拖再拍自白场口时，家怡陪伴在则，「佢其实走得但系冇走，一路喺度陪我，我演紧时听到佢都有情绪，净系喺度索吓鼻已经好帮到。」

Endy和家怡这场嗌交戏，喊足成晚拍到心力交瘁。

剧中Endy饰演的小男人，因八挂利用航拍机意外发现邻居以及家怡饰演的老婆秘密。问到跟另一半相处，是否如角色收埋秘密？单身逾10年的家怡就笑谓，「哗！long long time ago，等我谂吓先！如果我当初系咁就醒，我就系乜都讲好蚀底，其实系搵咗错的人，如果啱嘅人应该乜都可以讲。」Endy认同，「细个时乜都唔讲，或者有嘢想讲又唔敢讲，因为惊佢嬲，其实坦荡荡会好啲，但系有技巧。」家怡忍不住取笑他，「话惊佢嬲嗰吓，好似啲女仔。」Endy即扮娇嗲，「咩啫！系唔讲仲嬲嘛！对唔住罗，家怡姐！」原来家怡试过坦白未必从宽的伤心经历，「我以前好低能嘛，话以前拍拖嚟过呢度，讲完后依家呢个又记咗喺心，我讲嗰句系冇咩意思，但佢听完都会唔开心，其实我系咪唔系好ready？！唔关人哋事系自己问题。」