《叛逆美声》意大利摇滚巨星濑晒嘢成长史丨头条戏场

2024-05-31 06:00

69岁意大利摇滚巨星Gianna Nannini的传记电影，故事由童年开始横跨30年。出身富裕家庭的Gianna从小爱音乐，但严父只想个女打好网球，做运动员为家族增光，女主角细个话唔到事就陪你癫吓，越嚟越大就当然睬你都傻，好记得Gianna口头禅「我想做嘅事，就会去做」。全片有好多忧伤，好多毒品，一个关于坚持，排除万难的追梦故事。(已上架) 撰文:廖思慧剧照提供:NETFLIX

少女时的Gianna被迫打网球，Hea玩比赛一幕激死老窦。

Gianna好有才华，亦不断遇到好人帮佢。

Gianna 出生于Siena，家有父母及一弟，自小对音乐特别有感觉，完成父亲的所有学习要求，包括读书同练网球，就会扮揸咪跟住电视唱歌，妈妈觉得好可爱，一脸恶形恶相的父亲看在眼里非常唔锺意。由女童变少女，Gianna更热爱音乐，自弹自唱功力亦越来越劲，反抗父亲能力亦不断升级，好记得有一幕，父亲命令Gianna即场除下迷你裙，甚至立即剪烂，你就会预计到Gianna将会头也不回，有咁远走咁远。

因为郁郁不得志，觉得失望的Gianna难得获父亲关心。

Gianna对发型师Carla(Selene Caramazza 饰)一见锺情，但得到后又唔珍惜。

Gianna推出首张专辑，封面是自由神像拎住自慰棒，老窦嬲到震。

原生家庭的影响力
因为唔甘心亦唔想成为父亲期望下的大家闺秀，大个女的Gianna孭住结他离开大屋，只身到米兰发展音乐事业，有创作才华又有一把靓声，最重要后生，冇嘢输啦。电影著重Gianna的心路历程，点样向父亲证明自己脱离屋企都可以成功，及如何在理想及现实中作出平衡。Gianna曲风独特，歌词愤世嫉俗又好贴地，讲吓爱情、性同毒品，听到新相识朋友嘅快乐人生计划好有Feel，即刻写首歌出嚟，连处女专辑封面都系自由神像拎住自慰器，相当玩嘢。

电影唔系Sell励志，甚至觉得被毒品包围，过度博爱的Gianna糟蹋自己，故事线亦薄弱，睇唔出Gianna有几为音乐努力，但全片弥漫摇滚加自由Feel，所有歌亦好好听，人物好正又可爱，但真心拍得麻麻。