专栏｜肥普被炒唔需要大惊小怪

原本想承上集写关于车路士球员提升，不过今个礼拜忽然宣布炒普捷天奴，又要重新出发，全部嘢都系重新开始。𠵱家传宾福特嘅法兰、叶士域治嘅麦坚拿会接手，甚至连摩佬都出埋嚟。

我知好多人觉得炒肥普好奇怪，大家可能撑佢唔应该俾人炒，因为单计下半季嘅表现系英超第4，不过我尝试用另一个角度谂下究竟佢系咪值得被炒。

肥普操练过度令球员受伤，例如尼干古、史达宁等，又有好多都伤完再伤，令到经常难以全员待命，咁其实佢系咪要负番少少责任？季初望住个阵容，第6系咪球迷心目中满意嘅结果？今年有好多难忘嘅比赛，例如4:4和曼城同4:3绝杀曼联，但其实亦有唔少表现得好差嘅比赛，被阿仙奴大炒5:0、不胜般尼等，呢啲迹象都显示极高嘅不稳定性，大开大合依然存在喺肥普身上。

再加上今年联赛杯决赛亦有极之奇怪嘅变动，对住利物浦成班后生仔选择去缩，而唔系更加积极进攻，最尾被华基尔云迪积克一顶破网，佢又有责任。

个人有一个对肥普嘅质疑，队中两个世界级嘅中场，安素费南迪斯同摩西斯卡些度完全兼容唔到，车路士嘅连胜走势系因为无咗安素，但下季到佢返出嚟，都唔会解决到我实质嘅问题。

不过讲到尾，车路士炒人之处最奇怪系时间，季中又要球迷Trust the process，季尾状态正好嘅时候又炒，睇嚟要修成正果仍然需要一段好长嘅时间。Willhappy

-----

《星岛申诉王》推出全新项目「区区有申诉」，并增设「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ