P1X3L千辛万苦先开骚自嘲：抢到啲咩返嚟？爆笑重提出道被睇死又抢MIRROR资源丨独家

2024-05-25 07:00

由吴启洋（Phoebus）欧镇灏（George）及叶振弘（Marco）组成的P1X3L，成军3年终在月底举行首个演唱会，前两者会增磅操肌做准备。重提入行初期不被睇好，更被指会抢MIRROR资源，甚至被睇少冇资格组男团，重提旧事三人爆笑回应，玩自嘲更反问大家，「我哋抢到啲咩返嚟？」采访：杜杜摄影：谭志光场地:iza\'bis by city\'super

P1X3L演唱会除合体演出，当然亦有Solo表演。

Marco坚持带黑超访问，被队友「尊称」godfather。

P1X3L好重视苦等3年的机会，Phoebus指Rundown会以队名串连，「有时都惆怅做演员又唱歌，究竟边个先系我哋呀？！呢个正系P1X3L特色，就系冇咁多限制。」P1X3L跟大队开骚前努力操肌，但对于晒成果，George就落定闸，「冇刻意准备，人哋谂起P1X3L唔会谂起肌肉先。」Phoebus笑着补充，「我哋有肌肉担当！」Marco即认头，「我会骚前臂！」George有跟公司提议搵健身教练帮手，Marco火速举手，「健身教练就系我嘞！」两队员即拧歪面以示不满。Phoebus已进行事无忌惮食增磅计划，目标增20磅，Marco爆料，「佢想变金钟国。」Phoebus笑说：「又唔使去到金钟国咁，除衫啲人话瘦，希望有啲唔同。」George同样想增磅，「年头拍电影时好瘦好削，主要想练手臂，最紧要望落厚实着衫好睇啲。」

P1X3L视上月举行的《P1X3L 5G On Stage!》为热身。

Marco成为Phoebus和George健身教练。

花姐契仔George狂笑

2021年1月，P1X3L成军后首次接受本报访问，当时他们不被外界睇好，更被力数4大不应该成军的理由。相隔3年重提旧事，3子表现兴奋更逐点回应。对于知名度不足，Marco答得老实，「依家知名度都不足！」由于电视台工作较多，George经常忘记歌手身份，「突然间醒起，听日要上Chill Club唱歌喎！依家心态好啲，捉到既系演员亦系歌手方向。」Phoebus就从没忘记歌手身份，只是不适应，「通完顶30几个钟，再去新城颁奖礼，初出道未习惯。」

2021年1月，初出道的P1X3L受访，相处模式冇变，互窒又互补。

P1X3L出道前拍摄的首个综艺《大海男儿》。

另外讲到抢MIRROR资源，3人即狂笑反应劲大，George笑说：「𠵱家大家睇到我哋冇抢，抢到啲咩返嚟？今日仲要系姜涛诞（访问当日姜涛生日）。」访问地点在铜锣湾，Marco即讲笑：「死啦！对唔住呀！路过咋！」当年被封花姐契仔的George曾经好大压力，家阵笑得劲开心，「冇啦！𠵱家我哋都冇阿妈！」Phoebus更寸队友：「佢觉得真系会抢到资源，哈哈！」至于形象不够鲜明，Phoebus表示已有进步，「你睇佢（戴着黑超的Marco）一表人才。」George搭嘴：「成个教父，godfather！最紧要我哋好清晰想畀啲乜观众睇。」最后系冇观众缘，3人觉得Hater已较初出道时减少，Phoebus说：「七师父之后，我哋都不断收到好嘅说话，好多谢大家！」而被指偶包重的他亦放松了，「我系好在意观众点睇自己，有啲嘢唔透过人哋眼睛或者说话唔会知。」

2021年1月，P1X3L推出第1首单曲《Braceless》。

P1X3L认为奖项有很大鼓励，感恩出道以来都有奖攞。

Marco被回力镖击中

当年访问，George认为广东歌及新一辈歌手开始抬头，希望P1X3L亦能占一席位，更恳求「听姜涛嘅歌之外，都可以听吓P1X3L啲歌。」队友即起哄，Phoebus笑言：「口出狂言！」Marco就大笑：「以前咁有型咩，好正喎！」George认为目标未达到，但不会放弃，「唔多人听唔紧要，下首作品再做好啲，做到有人听为止！」而Marco就话识弹琴，会尝试写歌，不过3年后，仍未有作品面世，他即时「哗！」出声，队友轮住帮拖，Phoebus问，「使唔使帮你换位？！」George就教点答，「你话写紧，仲搵紧灵感啦！」Marco选择勇敢面对，「真系太愧疚，不瞒大家完全冇喺呢方面钻研过，亦冇pick up返钢琴，未来可能会作曲，钢琴就有阴影，细个成日比赛，压力大到谂返起都惊。」问到目标？3子希望可创作歌曲。