73岁郑则仕讨厌求人庆幸子女冇入行开明老窦唔恨抱孙公开家庭和睦秘诀丨独家

2024-05-23 07:00

73岁郑则仕（Kent）在《神耆小子》饰演刻薄专横富商「钱大海」，他开心跟一班新合作后辈相处愉快，又大赞初次合作的冼靖峰（Archie）很有天份又勤力，给予高度评价。「钱大海」跟子女关系极差，不过Kent哥现实跟一对仔女非常融洽，又庆幸他们没兴趣入行，免得要求人帮手。对于退休，Kent哥强调「仲有能力点解要退休？！」相当有型。采访：杜杜摄影：朱伟彦

Kent哥永不言休，认为工作可证明自己能力和存在价值。

Kent哥返TVB拍《神耆小子》，大部份对手均是新合作，他相当兴奋，「我系僵尸状态，有段时间冇吸新鲜血就会谢，打回原型变死尸，我打紧柴要吸啲血令自己复活，呢个剧好处系畀咗好多新鲜血我吸，首先系Archie 24岁热辣辣热血，先索咗佢先，樊亦敏、曹永廉、萧正楠都有唔同温度嘅血，今次合作好开心，佢哋带我行得好舒服。」

Kent哥在《神耆小子》演刻薄专横富商「钱大海」。

在《神耆小子》跟一班新拍档合作，Kent哥好满意。

对冼靖峰期望大

Kent哥特别点名赞初次孭重飞的Archie，「有一场4页纸好硬嘅戏，想拍时唔见咗佢，原来佢练咗两个几钟，佢都知嗰场戏紧要，但一对戏唔对路，出唔到个感觉要调整情绪同对白，佢做唔到，我话唔紧要同导演讲不如食咗饭先返嚟拍，佢冇食饭喺度练，食完饭落嚟半个钟左右，再拍1 take过OK，唔系讲笑难度好高，首先佢有天份，好勤力，有天份又勤力，衰极有限。」他更给Archie好高分，「佢所有嘢都好好，75分系对佢评价，或以上就系对佢个人。」他坦认很少赞人，对Archie期望好大，「希望见到佢好，我拍咗咁耐剧，基本上未讲过『希望佢好』，除咗《荷里活有个大老千》王子涵，晶哥（王晶）个女有呢种能力，表达得好，我对Archie有好大信心。」

Kent哥对冼靖峰有很高评价，睇好对方前途无限。

Kent哥跟林燕明婚后育有一对仔女，现已长大并已婚。

抱孙由仔女作主

戏中Kent哥跟仔女关系极差，现实中跟分别是33岁女儿和27岁儿子的关系就刚相反，「唔可以用非常甜蜜嚟形容，我会用非常融洽。」他跟仔女相处没秘诀，只得一招身教，「你做啲嘢会感染到佢哋，你讲一套做一套，教佢唔好讲大话，自己不停喺佢面对讲大话踩人，仔女日日听到，点会听得入耳，身教好紧要，最基本开始唔系社会教育，系家庭教育。」两名子女都已婚，长女依洛在科大毕业，跟丈夫定居上海做Marketing，细仔英国大学毕业返港做会计，婚后跟他同住。开明的他认为抱孙由仔女作主，「我生仔我养仔系应该嘅，唔希望我要养孙，问题系佢哋有能力又想，咪做罗！唔好话恨啦，以前旧嘅思想咪会恨，我唔会恨，有会好开心拍烂手掌，冇都开心，因为佢哋知道自己选择嘅路。」

1990年，Kent哥跟艺员林燕明结婚。

Kent哥曾公开大赞老婆又靓又好。

冇谂过几时退休

Kent哥长女依洛11岁时，曾跟他在亚视剧《法内情2002》合演父女，初次演戏已表现出色，「坦白讲我个女真系有天份，佢客串7日，我完全谂唔到佢好自然讲到对白，嗰时佢好有兴趣，我一开工佢走去望住个mon几个钟。」后来试过其他工作，女儿便转軚，而儿子从来冇兴趣做幕前，令他放下心头大石，「我个仔喺现场几分钟，就即刻标上车话『好热呀，我唔去嘞！』好罗！两个都唔想做呢行（鼓掌），恭喜自己，我唔想求人，自己都唔求人，要为仔女去求人，我觉得好冇面。」而且他认为入行都要讲资质，「有天份又勤力，喺呢行就有希望，先好踏只脚入嚟，如果呢两样嘢都冇，sorry bye bye啦！」