193曾为节目嘉宾心动怕濑嘢：要勒紧底裤仔 阿Dee爆笑求执导MV实录最终超支30万丨独家
2024-05-10 07:00 
193（郭嘉骏）＠ERROR早前推出单曲《B出口》，内容讲述爱情观，对于拍足124集的《晚吹-恋讲嘢》，193坦言曾经对嘉宾有Feel，但碍于身份冇进一步行动，为怕濑嘢，更要「勒紧个裤头，勒紧个底裤仔。」讲到队友Dee哥求做MV导演过程，193演绎非常传神，更大爆对方最终拍《B出口》MV超支30万，最后甚至游说193一人一半清埋条尾数。采访：杜杜 摄影：Stanley 形象:Lok Fong、Stephanie Choy 发型:Harris Lai 化妆:Cori Wong 服装:I.T.、JMDH、HOAX 场地:Seaview Viva
193早在制作《以为只是没送花》时，已跟监制舒文倾《B出口》主题，他解释歌名意思是爱情不止一种选择，「好多时两个人要迁就对方，为对方改变自己，但改变咗嗰个唔系佢？！其实会唔会有B出口？唔适合就放手，搵个唔需要迁就，都可以好开心细水长流嘅人。」
最憎女友想改变自己
歌曲非193的亲身经历，但也算「经验」之谈，「毕竟小弟系爱情长寿节目主持（《晚吹—恋讲嘢》），呢个系我主持咗咁多集，或者做咗咁耐人嘅爱情观。」问到曾否要求女友为自己改变？他即搞笑话：「梗系有啦！哈哈！喂呀，唔好喺我面前撩鼻屎。」另外，他最讨厌女方试图改变他，「要我去边、食饭影张相睇吓，我都冇叫你咁做，做咩你要叫我咁做？想改变我生活方式，唔好同咁多女仔玩喎，朋友唔系男仔就女仔。」主持了超过100集《恋讲嘢》，193获益良多，「学识最多就系唔好偷睇对方手机，呢个真系死穴，9成会闹交，每个人都有秘密，点解要偷睇啫，唔想畀你知嘅嘢咪唔好知，搵到个中间点去相处罗！」
冇时间拍拖唔想闹交
193自爆主持《恋讲嘢》时曾对嘉宾动心，「百几集总有啲系锺意嘅类型，或者性格好适合我，觉得好心动，但系勒住啦！冇攞联络，佢哋喺ig tag我、follow我都要勒住啦！做艺人最紧要勒紧个裤头，勒紧个底裤仔。」他认为做得公众人物就要有所牺牲，「会小心咗去交友识女仔，毕竟世途都险恶，小弟都系半个知名人士，唔好乱嚟，唔系就会畀人摆上网。」但他强调，就算做偶像都必需要拍拖，「当然可以拍拖，人都要抒发情感，冇咗爱情世界会缺乏好多嘢，但我𠵱家用好多时间工作，又要应酬friend，如果有伴侣畀得几多时间佢？！对人都未必公平啦！到时又闹交，又偷睇电话，睇吓系咪真系咁忙。」
阿Dee零导演费倒贴做
对于邀请阿Dee任《B出口》MV导演，193指阿Dee早在2、3年前已放风想执导队友MV，直到1年多前再提，「佢喺我哋临放工前再提『你哋MV下次不如试吓我做导演』，我见两个队友冇拒绝，但扮听唔到收工，当然我当时都扮听唔到啦！但就历历在目佢个尴尬、无奈、好失望嘅样，我就记录在案先。」所以再出歌就决定搵阿Dee拍，「唔系自己钱，自己钱就心痛啫！大家一齐挥霍公司钱几开心呀。」他赞阿Dee的执导功力较《ERROR大冒险》进步超多，「入行5年，最刻骨铭心回忆，冇得瞓觉，冇钱，拍几分钟网片，拍咗20几个钟，Over 10几个钟，Over到化妆师求唔好再mark佢，嗰阵佢未了解，有限嘅budget就要拍有限嘅嘢。」
193称阿Dee做了Budget Plan，依然疯狂超支，「我call两个赞助，但Dee大导都话唔够，个budget可以拍到10个《再次Puppy Love 》MV。」免导演费的阿Dee最终更倒贴，「好彩阿Dee系知名明星、KOL，可以帮手还赞助，佢自己call多两个返嚟，有4个赞助罗！但两个礼拜前阿Dee WhatsApp我，『3哥呀，差6万蚊做CG后期，你有冇兴趣一人夹一半呀？』我当然唔会覆佢有兴趣定冇兴趣，扮睇唔到，过几日佢开始同我讲其他嘢，唔知系咪佢畀，唔敢问，惊问咗就要畀。」他计落MV超支一倍，「本身我两个赞助佢搲多两个，仲差6万蚊，嗰度几10万，比我预算over咗20几30万，拍到两个以上《以为只是没送花》MV。」
《星岛申诉王》推出全新项目「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF
想睇更多精彩内容，请立即浏览「区区有申诉」活动专页，https://bit.ly/41hgS9E
《星岛头条》新网站有更多精彩内容：http://www.stheadline.com/
最新回应